La Universidá d'Uviéu refuga crear titulaciones nueves y apuesta “pola calidá frente a la cantidá”

Vicente Gotor, rector de la Universidá d’Uviéu, señaló na inauguración del cursu académicu que la institución “nun ta en condiciones de crecer nel so catálogu d'estudios”. Considera que ye momentu d’apostar “pola calidá frente a la cantidá”.

Na so intervención, solicitó comprensión a los alcaldes d'Uviéu, Xixón y Mieres pa qu'entiendan qu'implantar titulaciones de grau nueves "nun sería asumible nin comprensible nestos momentos". Comprometíu sicasí con garantizar la meyor ufierta docente, el rector discrepó de la política de recortes n'Educación y Investigación que "afeuten a tola comunidá universitaria y n'especial a munchos trabayadores que vieron reducíos de manera drástica sueldos que yá son bien baxos". "Vímonos obligaos a aplicar midíes y recortes colos que nun tamos d'alcuerdu n’absoluto", llamentó.

"Sé que nun ye un consuelu, pero, insisto, vamos buscar soluciones pa que les dificultaes actuales de financiación afeuten lo menos posible a los estudiantes y trabayadores", comprometióse minutos depués de que'l personal llaboral se concentrase con pancartes de protesta nel claustru. En presencia del presidente del Gobiernu, Javier Fernández, y de la conseyera d'Educación, Cultura y Deporte, Ana González, agradeció al Executivu la so "sensibilidá" pa permitir a la Universidá cumplir col compromisu de conxelar les tases universitaries en primer matrícula. "Un esfuerzu –precisó– que poques comunidaes autónomes fixeron".

Gotor pidió a Fernández que se dotara a la Universidá d'un marcu de financiación estable, "mínimu" y "indispensable" pa "siguir alantre y garantizar el meyor serviciu a la sociedá asturiana". Nesti sen, insistió na necesidá de que la institución recupere'l dineru –diez millones– qu'adelantó "pa numberosos pagos" y qu'agora son "imprescindibles p'arreglar la falta de liquidez". Frutu d'esta situación, el xefe del equipu rectoral reconoció que "lloñe d'aumentar la plantiya" la Universidá d'Uviéu "nun prorrogó places de profesores asociaos contrataos por necesidaes eventuales y que yá nun se podíen xustificar por necesidaes docentes", anque sí caltuvo "a tolos ayudantes, profesores ayudantes doctores y a los contrataos doctores", a los que se refirió como "la savia que garantiza'l futuru como Universidá".