La UE va considerar delitu’l racismu y la negación de los crímenes contra la humanidá

El Conseyu de Ministros de Xusticia de la Unión Europea llegó ayeri a un alcuerdu pol que tou mensaxe convidando a la práctica del racismu o la xenofobia va tipificase como delitu. La midida inclúi, sicasí, escepciones p'aquellos estaos miembros nos que la llibertá d'espresión permita manifestaciones racistes. Los países van tener igualmente llibertá pa castigar o non les espresiones racistes o xenófobes que nun llamen esplícitamente a la violencia.

La decisión marcu apauta castigos d'ente ún añu y trés de presidiu pa los llamaos a la violencia contra grupos pol so orixe étnicu nacional, racial o relixosu, o contra quien niegue o faiga de menos de menos los crímenes contra la Humanidá o xenocidios reconocíos por tribunales internacionales, ente ellos los crímenes del gobiernu nazi d'Alemaña.

L'alcuerdu, que s'aprobó coles reserves de siete países que precisen el preste de los sos parlamentos, tuvo una tramitación abegosa por causa de la posición de Polonia, Estonia y Llituania, qu'esixíen que l'alcuerdu incluyere tamién los crímenes estalinistes.

A la fin, namás Llituania aporfió nesta solicitú, alcordándose una amestadura que fala de que la decisión marcu nun cubre los delitos cometíos por rexímenes totalitarios, anque'l Conseyu d'Europa arreniegue d'ellos". Como midida compensatoria, ofrecióse-yos a los antiguos estaos comunistes la celebración d'una audiencia pública sobre crímenes y represión cometíos polos rexímenes totalitarios.