La UCE alvierte de clonaciones de tarxetes de créditu

La Unión de Consumidores d'Asturies fexo ayeri un llamáu d'atención sobre'l riesgu de fraude nes tarxetes de créditu pol delitu de clonáu o copia de la tarxeta, que suel rexistrar bien de casos tolos branos, sobremanera nos viaxes al estranxeru. Dos asturianos denunciaron nos últimos díes que-yos cargaren compres nel Brasil y nos EEUU.

Pa llograr facer una copia de la tarxeta, los delincuentes escuenden en caxeros automáticos sistemes electrónicos de duplicáu de la tarxeta y cópien-y'l númberu secretu, ello cuando nun collaboren con ellos trabayadores de tiendes que-yos dexen facer la copia. Un de los problemes d'esti delitu ye que la víctima nun se decata d'ello hasta que pasa un tiempu y recibe'l cargu na so cuenta. La UCE recuerda que ye preciso denunciar los fechos énte la policía y darréu avisar al bancu emisor de la tarxeta.