La UABRA celebra'l cursu presencial de gallego-asturiano n'A Caridá

La programación inclúi dos conferencies abiertes al públicu los díes 3 y 10.

Una vegada finaos los tradicionales ‘Cursu Elemental de Llingua Asturiana’ y el ‘Cursu Avanzáu de Llingua Asturiana’, que tuvieron acompañaos na primer selmana pol de ‘Capacitación pa la traducción al asturianu’, toos en llinia, la Universidá Asturiana de Branu (UABRA) qu'entama l'Academia de la Llingua Asturiana (ALLA) en collaboración cola Universidá d'Uviéu sigue col ‘Curso de Capacitación en Eonaviego ou Gallego-Asturiano’. Ésti principió'l llunes y va allargase hasta'l día 12, cola particularidá de que ye presencial.

El Complexo Cultural As Quintas da Caridá ye'l llugar onde se desendolquen les clases de la primer fase d'esti cursu que da la posibilidá de poner clase de gallego-asturiano a les persones con la formación afayadiza pa ello. Como ye tradición na UABRA, la docencia compleméntase con actividaes, nesta ocasión dos conferencies.

Esta tarde, a les 18 hores, Benxamín Méndez, doctor en Xeografía y especialista n'ordenación del territoriu y mediu ambiente, va falar de ‘Condicionamentos y valías paisaxísticas del Navia-Eo’. El miércoles el turnu va ser pa Carmen Siñeriz y Natalia Riego, miembros llaborales de l'ALLA na Comisión Lexicográfica del Diccionario d'Eonaviego, que van afondar nel ‘Prantiamento metodolóxico y primeiros resultaos da comisión lexicográfica del diccionario normativo d'eonaviego’.