La torna al castellanu de la novela ‘La bufanda’ yá ye una realidá

La editorial Corner, especializada en temática futbolística, ta acabante d’asoleyar la novela ‘La bufanda’, de David Artime, en castellanu. La historia orixinal, escrita en llingua asturiana, fala de la vida d’un ultra del Sporting.
 
En concreto, la novela cuenta les vivencies y peripecies de Pablo Izaguirre Soto, 'El Piru', mientres el tramu últimu d'una temporada lliguera na que'l so equipu llucha por evitar el descensu. Les contradicciones ente la so visión ídilica del mundu ultra y la realidá d'aspeutos como la violencia, la política o la mercantilización del fútbol modernu fairán a El Piru replantegase'l so futuru como ultra, asina como la trayeutoria de la so propia vida, na que la so condición d'hincha incondicional exerce una influencia difícil de compaxinar. Y va tener que tomar decisiones importantes. Esta obra foi ganadora del Premiu de Narrativa d'Ediciones Trabe nel añu 2009 y publicada daquella por esta mesma editorial.
 
Artime mostróse "ilusionáu" cola publicación en castellanu de la novela y confía en que llegue al "mayor númberu posible de rincones”, porque pese a tar ambientada na afición del Sporting podría aplicase "al entornu de cualquier equipu de fútbol con un mínimu de tradición". "En tolos campos podría haber un Piru", comenta l'autor. Espera, amás, que la so obra contribuya "a aportar una visión nueva del mundu ultra", na que, sin "resalvar los sos aspeutos negativos, especialmente'l de la violencia, destáquense tamién otros positivos", y consígase un analís nel que "primen los equilibrios".
 
L’ex entrenador del equipu xixonés, Manuel Preciado, encargóse d’escribir el prólogu de ‘La bufanda’. El d’Astillero destaca'l caráuter "risonderu y bipolar" de la novela porque muestra "les dos cares del mundu ultra": per un llau, les barbaridaes qu'en dellos casos prautiquen estos grupos y que nun han tener nenguna xustificación y, per otru, los valores del compañerismu, la camaradería y la fidelidá a los colores d'un equipu".   Preciado asegura tamién sentir hacia'l Sporting la mesma "identificación" que'l protagonista de la historia porque "los seis años que pasé nesa casa, que yá considero de mio per siempre, foron los meyores de la mio vida futbolística", señala’l cántabru.