La toponimia de L.lena tamién llegó al BOPA

Los trés últimos conceyos que pasaron la revisión de la so toponimia per Conseyu de Gobiernu tiénela yá oficializada dafechu. Anque con retrasu sobre los llistaos toponímicos de Llangréu y Gozón, L.lena tien tamién los sos topónimos espublizaos en BOPA dende esti martes. El llistáu definitivu colo topónimos l.lenizos nun aporta diferiencies sobre estudios anteriores yá esistentes sobre la toponimia del conceyu, y únicamente hebo problemes colo vecinos de Xomezana, que reclamaben les formes "Xomezana Fondera" y "Xomezana Zimera" (con Z) basándose nunos documentos del sieglu XVI, anque Conceyu y Xunta de Toponimia aprebaron a la fin la opción "Xomezana Riba" y "Xomezana Baxo" pa nomar estes parroquies.

Cola toponimia yá oficializada nes manes, l'alministración d'esti conceyu del sur d'Asturies propónse aplicar los topónimos tradicionales en toles sos estayes de gobiernu con efectos inmediatos, tando previstu pa la selmana qu'entra'l repartu d'una circular encamentando l'usu de les formes toponímiques acabantes d'aprebar, en cuantes, que, per otra parte, la mesma resolución del BOPA da anuncia de que les formes anteriores de los topónimos perdieron dende esti martes toa validez.