La televisión autonómica asturiana presentó a les empreses coles que va trabayar

L'ente de Radiotelevisión del Principáu d'Asturies dio esta mañana una rueda de prensa na que presentó les empreses del sector audiovisual que van collaborar na ellaboración de la programación de la canal de TV. José Ramón Perez Ornia, director xeneral del ente, compareció en Parador Nacional de Xixón acompañáu de representantes d'ocho de les venti empreses que van participar cola autonómica y esplicó qué estaya va atender caúna d'elles.

Perez Ornia, que declaró que taba "mui contentu" del trabayu "d'estes empreses de prestixu que suponen un aval de garantía y calidá" declaró tamién que "a nenguna empresa se-y pidío filiación política a la hora de contratar con ella" y fizo una presentación na qu'adelantó dellos datos sobre'l trabayu que va facer la RTPA con estes empreses, ente les que rescamplen les cabeceres editoriales de los trés periódicos más importantes d'Asturies xunta otres como Bitácora, Videoimagen o Telefónica, y sorrayó ques los contratos con estes firmes "demuestren que la RTPA crea emplegu y riqueza, peritando en cerca de 200 los trabayadores que van tar rellacionaos col proyectu de la RTPA". Otramiente, el directivu nun aclarió la fecha d'entamu de la programación estable de la televisión, mientres que de la emisora de radio y el portal d'internet venceyaos a la RTPA dixo que "yá se falaría".

Ornia llamó l'atención sobre'l fechu de que les cases responsables de los trés grandes periódicos d'Asturies (La Nueva España, El Comercio y La Voz de Asturias) van collaborar empresarialmente cola RTPA. Asina, El Comercio, al traviés del llabor de 40 profesionales, va encargase d'ocho de les nueve corresponsalíes de la RTPA, en concreto les de Xixón, Avilés, Mieres, Llangréu, Cangas del Narcea, Navia, Nava y Cangues d'Onís, mientres que la empresa Asturmedia, na que trabayen en comuña La Nueva España y Mediapro, va encargase, con 26 profesionales produciendo noticies de deportes y 18 nes tresmisiones, de la información deportiva de la RTPA. El tercer gran diariu asturianu, La Voz de Asturias, tamién va participar empresarialmente na RTPA anque, en cuenta de facelo na estaya de conteníos y programación, nesti casu la so participación, que va correr al cargu de la casa matriz ZETA Xestión de Medios, va consistir na comercialización de los productos publicitarios de la TV. Tamién en rellación cola publicidá, pero nesti casu nel separtáu de les autopromociones de la RTPA va tar la empresa Bitácora.

Ente les demás empreses que van xestionar espacios d'importancia na TV van tar les productores Videoimagen, que va llevar la corresponsalía d'Uviéu, Telefónica Servicios Audiovisuales, que va encargase d'una corresponsalía en Madrid, o la empresa Médula Producciones, que con una plantiya de 42 persones, va producir los programes infantiles de la RTPA, amás de les productores Zebra y Proima, que van llevar la producción de programes d'entretenimientu.

Tres d'esta presentación, Perez Ornia va comparecer na Xunta Xeneral pa informar de les llinies básiques de la programación de la televisión autonómica y dar un adelantu de la programación cola qu'esta va echar a andar.