La supresión del portalgu del Güerna exe central del debate políticu n'Asturies

Na celebración esti fin de selmana de la XXVIII Fiesta Minera
astur-lleonesa en Riodermo (Lleón), Zapatero comprometióse a
que'l "1 de xineru de 2008 va facese la siguiente fase de rescate del
portalgu del Güerna, y esta vez va abarcar a tolos vehículos",
aseguró. Pela so parte'l PP en boca d'Ovidio Sánchez
acusólu de "engañar" a tolos ciudadanos con promeses
electorales que nun cumplió, mientres que'l coordinador xeneral
d'IX-BA-LV, Jesús Iglesias, criticó l'actitú
"marcadamente electoralista" de les anuncies del presidente
español.

Asimesmo'l presidente Rodríguez Zapatero afirmo que va haber
"una xuba de les pensiones mínimes pa tres millones
d'españoles del doble de la subida media de les pensiones".
Prometió tamién un avance de "110 euros al mes, 1500 euros
al añu, pa terminar con una subida del 60% nesta llexislatura pa les
viudes y viudos menores de 65 años cumplíos al aumentar en tres
años más de lo que lo fairía'l PP nos sos ocho exercicios
en La Moncloa". En cuantes a l'autovía La Espina-Ponferrada
adelantó que'l conveniu va pesllase "enantes de que fine
2007".

Pela so parte'l presidente del PP d'Asturies, Ovidió Sánchez,
dixo qu'al presidente d'España "acabóse-y el tiempu pa
cumplir con Asturies" y acusólu de "engañar" a
tolos ciudadanos con promeses electorales que nun cumplió.
Sánchez, nuna rueda de prensa na Xunta Xeneral, respondía asina a
la intervención de Zapatero ayeri en Rodiezmo (Llión), onde dixo
que'l PP foi'l responsable de prorrogar el portalgu. Sicasí,
Sánchez dixo que foi'l PSOE'l que punxo'l portalgu y qu'amás
teníalu prolongáu hasta l'añu 2021. "El PP lo que
fixo foi comprometese a realizar l'Onzonilla-Benavente ensin portalgu, y
cumplió", afirmó. Pol contrariu, según espunxo,
Zapatero comprometióse na campaña electoral del 2004 a suprimilu.

Finalmente'l coordinador xeneral d'IX-BA-LV n'Asturies, Jesús
Iglesias, criticó l'actitú "marcadamente electoralista"
de les anuncies realizaes pol presidente del Gobiernu, al considerar que
"utiliza" les pensiones y les infraestructures como
"instrumentos de captación de votos". Iglesias pidió,
amás, "más claridá" en relación a la
bonificación del portalgu. "Puede intuyise que la propuesta ye
facer estensible a tolos vehículos la bonificación del 30 por
cientu que tienen los conductores profesionales anque nun hai nada en
claro". Nesti sentíu, preguntó "cuántes
elecciones autonómiques y xenerales más van facer falta pa la
eliminación del portalgu del Güerna".