La Sociedá Uvieína de Festexos va gastar 1,2 millones nel programa de San Mateo, qu'inclúi 16 conciertos

La Sociedá Uvieína de Festexos va gastar 1.200.000 euros nes
fiestes de San Mateo. Los actos festivos van celebrase del 14 al 23 de
setiembre y la programación inclúi 16 conciertos, actividaes
infantiles, desfiles y romería ente otres actividaes. El conceyal de
Cultura, José Suárez Arias-Cachero, y el presidente de la SUF,
Javier Batalla presentaron el programa festivu nel que va haber actuaciones
ente otros de "Prodigy", Isabel Pantoja, Miguel Bosé y
"Fito y Fitipaldis".

Arias-Cachero destacó de los actos programaos pa esta 57
edición de San Mateo la participación popular y el
"decidíu" apoyu per parte del Conceyu d'Uviéu a los
grupos de tolos estilos. "Tolos díes va haber actuaciones adaptaes
a tolos públicos", dixo'l responsable municipal. Los conciertos que
se van celebrar esti añu van ser na plaza de la Catedral, el de Marta
Sánchez y 'Delincuentes', la Nueche folk, la Nueche de Jazz, el
conciertu de "El Sueño de Morfeo", la Nueche Sol
Música, la Nueche Latina, el conciertu de Lolita y Pablo Moro, la Nueche
Flamenca y l'actuación d'Isabel Pantoja, quien va cobrar 70.000 euros.

Respecto a la programación en San Lázaro, el conceyal
citó los conciertos de "Fito y Fitipaldis", la nueche rock, el
conciertu de Miguel Bosé, de "Nacha Pop", la nueche Hip Hop y
l'actuación de "Prodigy". Respecto a esta última,
Javier Batalla aseguró que l'actuación de "Prodigy" va
compensar la nueche "techno" que nun se pue celebrar por problemes
d'horarios. Arias-Cachero refirióse nesti sentíu, al compromisu
de respetu qu'hai ente'l Conceyu y les estremaes empreses que participen en San
Mateo 2007, col fin d'adaptar horarios y compatibilizar les fiestes col
descansu d'aquellos que tengan de trabayar. "Demientres la selmana, los
chiringuitos van apagar la música a les 2.30 hores y en San
Lázaro, los conciertos van finar como mui tarde a les 3.30 hores",
dixo'l conceyal.