La situación del asturianu na enseñanza: “profesores ensin plaza y places ensin profesor”

|
Pupitres escolares

Esta selmana quedaron ensin cubrir trés places de la materia de Llingua Asturiana y Lliteratura en Secundaria “y ésta nun ye la esceición, sinón la norma dende qu’entamara’l cursu”, tamién pal gallego-asturiano, denuncia CSI Educación. El sindicatu esixe a la Conseyería d’Educación “que busque dalguna fórmula pa poner solución a esta situación”.

“Profesores ensin plaza y places ensin profesor. Ésa ye la situación que se vive n’Asturies nesti momentu”, asegura la estaya educativa de la Corriente Sindical d’Izquierda (CSI), qu’esplica que “tolos martes la Conseyería d’Educación publica les places que ye necesario cubrir, tanto n’Educación Primaria como n’Educación Secundaria. Y tolos xueves, cuando dende esta conseyería s’espublicen les axudicaciones, vese que dalgunes de les places nun cunten con un profesor o profesora que les ocupe”.

Esti últimu foron 3 en Secundaria. “Y ésta nun ye la esceición, sinón la norma dende qu’entamara’l cursu. Repítese lo mesmo en Primaria y en Secundaria; repítese lo mesmo en Llingua Asturiana y en Gallego-asturianu. Toles selmanes un fenómenu idénticu dende setiembre”, llamenta.

Nesi sen el sindicatu apunta que nun son los únicos casos nos qu’asocede, yá que ye una situación que se repite n’otres especialidaes como la de Lengua Castellana en Secundaria, “sicasí estes materies sí son los casos más llaceriantes, yá que’l profesoráu de dambes asignatures cunta con menos derechos que’l restu de los trabayadores de la educación asturiana. Al nun esistir la especialidá docente, tampoco nun esiste la posibilidá de presentase a oposiciones. Entós, les condiciones d’esti profesoráu son peores que les del restu. Ye un grupu de trabayadores con menos derechos que los sos compañeros y compañeres”.

Y los grandes perxudicaos son “les y los estudiantes”, que pasen meses ensin maestros. “Nun se respeta’l so derechu a la educación. Y, al añu siguiente, una parte bien bultable decide abandonar l’asignatura, con tolo qu’ello supón a la escontra de la tresmisión del idioma. Si nun hai profesor o profesora, ¿pa qué se van matricular?”, entrúgase.

Poro, CSI Educación reclama a la conseyería “que busque dalguna fórmula pa poner solución a esta situación. Namás cola aprobación de la especialidá vamos ver los derechos del profesoráu de les nuestres llingües propies n’igualdá col restu, pero, hasta que la aprueben –lo que yá tendría que tar fecho va cuantayá–, necesitamos dalguna midida que permita acabar col problema”.

Contador Estadistiques