La sesión constitutiva de la Xunta Xeneral va celebrase’l 27 d’abril

Francisco Álvarez-Cascos, presidente d’Asturies en funciones, firmó esti martes el decretu pol que se convoca la sesión constitutiva de la Xunta Xeneral. Ésta va tener llugar el vienres 27 d’abril al meudía.
 
La Llei Orgánica 7/1981, de 30 d’avientu, del Estatutu d’Autonomía del Principáu d’Asturies establez que’l presidente cesante convocará, dientro de los quince díes siguientes a la celebración de les eleiciones (25 de marzo), una vegada proclamaos pola Xunta Eleutoral los diputados eleutos (10 d’abril), la sesión constitutiva de la Xunta Xeneral. La convocatoria va salir espublizada mañana nel BOPA.
 
Tovía se desconoz quién va ser presidente próximu del país, yá qu’hai un empate téunicu ente la izquierda y la derecha (22 diputaos), quedando en medio UPyD col so escañu únicu, que va resultar determinante. Les formaciones polítiques continúen celebrando reuniones p’algamar alcuerdos que-yos permita garrar el Gobiernu d’Asturies y esti martes aconceyaron representantes de Foro de Ciudadanos y del partíu de Rosa Díez, segundu alcuentru de les dos formaciones nos díes últimos, del qu’unos y otros dixeron salir satisfechos.