La selmana en bolsa

Selmana feble nes bolses dempués d'unos probetayos resultaos nos Estaos Xuníos xunta la recoyida de beneficios de dellos inversores. Les anuncies de la Reserva Federal y del BCE sobre posibles cambeos nos tipos remataron un final de xineru enllenu de blincos pero con xuba del volume de negociu. L'Ibex tuvo una permala selmana, perdiendo los 8.000 puntos. A la contra, el mes foi positivu pa la Bolsa de Madrid, que peslló con una xuba mensual del 2,5%, resultáu que nun se vía dende xineru del 2001.

La otra selmana hebo estadístiques y datos económicos importantes de tolos signos. Nel Vieyu Continente diose anuncia de les ventes minoristes nel Estáu Español, que medraron un 29,4% dempués d'una cayida penriba'l 7% nel periodu anterior. La tasa de desemplegu francesa tuvo una xuba del 9,7%, y na Zona Euru'l datu de confianza del consumidor cayó 16 puntos. Pero les más de les estadístiques vinieron del otru llau del Atlánticu, siendo la estadística de la selmana'l datu de PIB d'Estaos Xunios, que foi del 4% cuando los analistes contaben col 5%. Una mala anuncia que tiró p'abaxo peles bolses, col índiz Dow Jones cayendo'l 0,21% y el tecnolóxicu Nasdaq el 0,10% .

Les bolses internacionales tuvieron una mala selmana pola inestabilidá de los mercaos de divises, los probetayos datos d'Estaos Xuníos y la situación de dellos mercaos locales, casu del esfarraple de la bolsa brasileña. Les places europees de Milán, Frankfurt y París tuvieron perdes alrodiu'l 1%. L'anuncia empresarial de la selmana foron los movimientos corporativos nel sector farmacéuticu ente Novartis y Aventis.

La selmana pasada foi la peor dende setiembre del 2.003. De fechu l'Ibex-35 perdió la cota sicolóxica de lo 8.000 puntos dempués d'una selmana baxista anque con altu volume de negociu. El selectivu Ibex-35 asitióse nos 7.929 puntos lo que supón una cayida selmanal del 2,27%. El llau positivu ye la ganancia del 2,5% nel total de xineru, siendo'l cuartu mes consecutivu con pieslle positivu. Les cayíes más señeres foron pa los blue chips como Repsol, Endesa, Inditex, Altadis y BBVA, con perdes penriba'l 1%. Ente les xubes los más beneficiaos foron los valores del sector de la construcción como Acciona, FCC y ACS. Al Grupu Telefónica torcióse-y la selmana, perdiendo la matriz más del 2% y entovía más la filial de móviles. Los valores más beneficiaos foron los bancos Pastor y Guipuzcoano dempués de l'anuncia del Popular de mercar eses entidaes pa nun quedar atrás dempués de les compres del Barclays y el Sabadell. El castigáu Amper tuvo tamién una bona selmana al dar anuncia de la compra d'una empresa competidora del sector electrónicu.

El Bancu Central Européu nun tien intención de xubir los tipos d'interés nel primer semestre d'esti añu. Según comentaron responsables del BCE, la Zona Euru va caltener los tipos invariables na primer metada d'esti añu. Los espertos macroeconómicos de la Xunión nun ven razonable una baxada de tipos porque entovía ye asumible l'amenaza del tipu de cambéu euru-dólar. Tampoco nun ven una xuba hasta que recuperen les economíes d'Alemaña y Francia. Mentanto, l'euru tuvo una selmana moderada nel mercáu de divises, cambiando en 1,2435 dólares. La selmana pasada foi la del yen yá que'l Bancu Central del Xapón reconoció que vendiere más yenes que nunca col oxetivu d'atayar la xuba llibre de la divisa xaponesa.

Nes materies, cayida del preciu del barril Brent ante unes espectatives de moderación del consumu enerxéticu na primavera. El preciu del petroleu llegó cayer penriba'l 5% hasta los 29 dólares-barril. Na mesma llinia l'oru tamién tuvo una selmana baxista énte la recuperanza del dólar. Nel mercáu de renta fixo los bonos a diez años dieron blincos, pero con tendencia al alza.