La selmana de les lletres va dedicase a la poesía asturiana contemporánea

La poesía contemporánea n'asturianu va centrar los actos de la Selmana de les lletres 2005, que, como ye tradicional, va celebrase la primer selmana del mes de mayu. Ramón d'Andrés, responsable de la Oficina de Política llingüística, esplicó a Asturies.com que, anque entovía queda muncho por concretar sobre los actos de que va constar la tradicional cita cultural, yá pue adelantase que la selmana de les lletres 2005 va dedicáse-yos a los poetes asturianos contemporáneos. Ello va ser amás dientro d'un enfoque ampliu, ello ye, ensin poner una llende xeneracional nin estilística, de manera qu'entren nel homenaxe dende xeneraciones anteriores al surdimientu hasta los autores más de recién.

Asina, l'organismu de la Conseyería de Cultura ta preparando "actos y recitales dedicaos a tolos poetes vivos y n'actividá qu'escriban n'asturianu y tamién en gallego-asturianu". Nesti sentíu, d'Andrés destacó que parte de los actos de la selmana van celebrase na fastera del Navia-Eo y van dedicase-yos especialmente a los autores nesta modalidá llingüística. Otra de les novedaes importantes de la Selmana qu'adelantó d'Andrés a Asturies.com ye que "van traese a los actos de la mesma a importantes personalidaes lliteraries de fuera d'Asturies" anque entovía ye ceo pa dicir qué escritores estranxeros van convidase pa la cita. La edición d'una antoloxía de testos y d'un llibru de trabayos rellacionaos col tema central de la selmana, como ye tradicional, tamién van caltenese pa esta Selmana de les Lletres 2005