La selección asturiana de h.oquei xuega esti miércoles con Suiza

La selección asturiana absoluta masculina de h.oquei sobre patines va volver a xugar esta navidá, siendo la única selección asturiana que va facer partíu estes fiestes. Cuatro años dempués d'enfrentase con Portugal, Asturies va midir les sos fuerces con Suiza, subcampeona d'Europa nel campeonatu que se celebró n'Italia y nel que xugaron la final contra l'equipu español.

El partíu va facese en Grau, una villa que ye, xunto con Uviéu, el llugar con más tradición d'Asturies nesti deporte. La cita ye a les 8 de la tarde del miércoles 27, y la selección asturiana, col xugador Toni Sánchez de capitán, va contar con Benchi Garrote y Miguel Navajas, técnicos del Esfer Uviéu y l'Areces Elecinco de Grau, d'entrenadores. Les entraes cuesten trés euros pa los adultos, mientres que los menores de 18 años paguen un euru.

La idea cola que trabayaba'l departamentu de deportes del Gobiernu asturianu yera la de facer un partíu de baloncestu masculín, pero la falta de feches disponibles nun lo permitió. Tamién se contaba con organizar un partíu de balonmano, pero la concentración de la selección absoluta española torgó esta posibilidá. No tocante al fútbol, les diferiencies ente la Federación y la Dirección de Deportes que llevaron a que la selección de fútbol desapaeciere siguen ehí, polo qu'esti añu tampoco va poder vese a xugadores como Villa, Angulo o Sergio Fernández la camiseta azul y mariella.