La Segunda arrancará'l sábadu con 22 equipos y ensin el Murcia

La LFP anunció que la lliga de Segunda División arrancará'l sábadu con 22 equipos y ensin el Real Murcia. Los pimentoneros anuncien que van acudir otra vuelta a los tribunales.

El Real Murcia yá recibiera una sentencia favorable del xulgáu de lo Mercantil númberu 7 de Madrid qu'obligaba a la Lliga de Fútbol Profesional (LFP) a la reincorporación de los murcianos na Segunda División y que la patronal de clubes descartó cumplir nuna reunión caltenida ayeri. La Real Federación Española de Fútbol (RFEF) refugó una lliga de 23 equipos en Segunda División y afaló a principiar la competición esta fin de selmana, como taba previsto, polo que la LFP decidió dexar fuera al Murcia y caltener al Mirandés, equipu descendíu la temporada pasada con meyor clasificación. Poro, el Sporting viaxará a Soria pa disputar el so choque col Numancia (21 hores, Más que Tele) y el Murcia pasará a formar parte del grupu 1 de la Segunda División B xunto con asturianos, castellanos, lleoneses, gallegos y cántabros.

Sicasí, podría haber novedaes nos díes próximos, yá que Jesús Samper, máximu aicionista del club pimentoneru, promete defender a la so entidá hasta l'últimu momentu. De fechu, el xuez convocó al club y a la LFP pal xueves a un audiencia pa resolver el conflictu. Javier Tebas, presidente de la LFP, llegó a comentar na rueda de prensa d'ayeri que tien preparaos 4 millones d'euros pa una posible indemnización al Murcia. Dellos xuristes nun descarten una posible paralización de la competición por orde del xuez, lo que tamién perxudicaría a los equipos asturianos de la categoría de bronce.