La Santa Teresa más sensual proyéctase nes pantalles asturianes

La vida de Santa Teresa de Jesús interpretada pola actriz
española Paz Vega y dirixida por Ray Loriga ye ún de los estrenos
que llega a los cines asturianos esta selmana. Col títulu de
"Teresa: el cuerpo de
Cristo", nella a l'actriz española acompáñenla
Leonor Watling, Geraldine Chaplin, José Luis Gómez, Eusebio
Poncela, Álvaro de Luna, nuna obra na que se recrea la vida de Teresa de
Cepeda y Ahumada, nacida n'Ávila en 1515, fía d'un fidalgo,
relixosa, esritora y finalmente santa conocida polos sos éstasis
místicos. La cinta yá recibió delles crítiques por
parte de la Ilesia, al traviés del críticu de cine de la
conferencia episcopal, Juan Orellana, qu'ente otres coses
señaló'l "desaciertu na interpretación" que-y da Paz Vega a
la Santa porque "favorez una sensualidá que desdibuxa seriamente al
personaxe de la santa. El críticu eclesial afirma que "ciertos arrobos tan interpretaos como si
se tratara d'orgasmos sexuales, lo cual tamién da pie a una
interpretación esclusivamente materialista de la esperiencia
mística.".

Dos drames d'época tamién lleguen a les pantalles del nuesu
país, "Man to
man" y "El velo
pintado". Na primer d'elles, ambientada nel sieglu XIX, Joseph Fiennes
y Kristin Scott Thomas interpreten a un medicu escocés y una aventurera
holandesa que viaxen al África ecuatorial en busca de los
oríxenes de la humanidá. Ehí capturen a dos pigmeos que
son treslladaos a Edimburgo y exhibidos públicamente como
"eslabones perdíos" de la evolución humana.
Sicasí la pareya protagonista ye consciente de la humillación a
la que se ta sometiendo a los dos africanos y lluchen por devolve-yos la so
dignidá y ayudalos a volver a África, lo que-yos causa problemes
cola sociedá de la época. La segunda de les películes
narra la historia d'amor d'una pareya inglesa interpretada por Edward Norton y
Naomi Watts que deciden casase por motivos equivocados y asitien en Shanghai
nos años 20. Nesta exótica ciudá, la protagonista va
enamorase d'otru home. Mas estrenes na nuesa
cartelera.