"La Ribeseyana" va ser el nuevu discu de Corquiéu

Corquiéu, qu'actua güei de nueche en Xixón,
prepara'l so nuevu discu que va entamar a grabar dientro d'un par de
selmanes.



Estos ribeseyanos foron mui bien recibíos cuando sacaron les sos
dos primeres pieces naquel
Nueva
Xeneración Folk, y sobre too, depués cuando sacaron el so
primer trabayu discográficu
"La
Barquera". Pero dende aquel discu yá van casi trés
años, y los siguidores de la banda va muncho que tán naguando por
sentir los nuevos temes del grupu. Esa espera pez que va acabar ceo, porque
según comentó a Asturies.com el so gaiteru Rigu
"Corquiéu vamos entrar a grabar el nuevu cd el nueve
d'avientu nos estudios Eclipse d'Uviéu". El músicu
tamién apuntó que "La banda va siguir fiel al so
estilu de folk acústicu, onde la voz tien abonda importancia, va tar
presente nel 50 % los cantares, y onde vamos siguir faciendo un folk de
composición, yá que nesti nuevu discu'l 95 % de les
melodíes van ser compuestes".



Esti discu que yá tien nome, "La Ribeseyana",
tamién tien yá productor musical, que va ser el felpeyu
Ígor Medio, responsable tamién ,xunta l'otru felpeyu Carlos
Redondo, de la compañía de discos que va sacar el cd a la cai,
"Tierra". La Ribeseyana, que va tener 12 cantares, "va
grabase n'Asturies pero la mezcla va facese n'escocia onde de xuru va haber
dalguna collaboración anque inda nun se pueden confirmar".
Pa poder sentir el discu tovía vamos tener qu'esperar hasta polo menos
el mes de marzu, que ya pa cuando calculen nel grupu que tea preparáu.
Con too y con ello, güei mesmu, xueves 25, podemos ver a
"Corquiéu" en directo.
L'actuación va ser nel chigre Ca Beleño de Xixón a eso de
les 22:30, y ellí guapamente vamos poder escuchar dalgunos de los
cantares del nuevu discu de "Corquiéu".