La reconversión ganadera

Tres de les prexubilaciones na mina y la siderurxa, el campu asturianu ye l'oxetu de va unos años p'acá d'una campaña de subvenciones y ayudes al abandonu de l'actividá ganadera. L'avieyamientu de la población rural y la perda de rentabilidá de les pequeñes esplotaciones llevaron a 813 propietarios y trabayadores del sector a acoyese a les prexubilaciones qu'ufierten el ministeriu d'Agricultura, Principáu y la UE.

Ente estes tres instituciones punxeron nel 2.002 un total de 28,82 millones d'euros pa pagar les prexubilaciones ganaderes. La UE, al través del Feoga, ye, con muncho, la que más pon, con 18,73 millones de euros, mientres qu'el Ministeriu d'Agricultura punxo 6,653 y el Principáu apoquinó los 3,44 millones d'euros que queden.

Anque les anuncies oficiales dicen que l'oxetivu principal de les prexubilaciones ye collaborar al remocique del sector, los datos espliquen que de les 18.887 hectaries que dexaron los propietarios prexubilaos nel 2.002, namás 6.759 (sobre'l 35%) caltuvieron usu ganaderu en manes de propietarios nuevos, mientres que 12.128 cambiaron pa usos non rellacionaos cola a agricultura. El caláu de la reconversión que ta afectando a la ganadería asturiana conozse en viendo que les prexubilaciones asturianes faen cerca del 25% del total de 3.330 que se dieron en tol estáu y que los prexubilaos asturianos son más mozos que la media estatal, asitiándose los más d'ellos na banda de los 55-60 años.

Con vistes al futuru, les previsiones oficiales de prexubilaciones nueves d'equí al añu 2006 son d'una media de 250 ceses al añu que van lliberar sobre 3.000 hectaries.