La Quintana prepara'l X Alcuentru de bandurrieros en Caliao

L'Asociación de Folclor Tradicional "La Quintana" de Xixón va celebrar el próximu sábadu día 5 de mayu del 2007, la 10 edición del Alcuentru de bandurrieros que tolos años, coincidiendo cola fiesta de la Santa Cruz, organiza l'asociación nel pueblu de Caliao, nel conceyu de Casu.

Pa esta edición "La Quintana" fai alcordanza d'estes 10 ediciones al traviés de la esposición complementaria "10 alcuentros, 10 bandurrieros", que va poder vistase nes antigües escueles del pueblu, llugar onde a les 6 de la tarde del sábadu 5 de mayu va facese un homenaxe a la persona del bandurrieru Pepe Calvo.

Pa esti homenaxe va facese una conexón en directo al traviés d'internet cola capital arxentina, Bonos Aires, onde vive la fía d'esti músicu yá desapaecíu, Mari Carmen Calvo. Darréu d'ello, los alcuentros van concluyir col tradicional conciertu, nel que van intervenir los bandurrieros Chema Puente, Miguel Cadavieco, Alberto Jambrina o Daniel García de la Cuesta, conocíu tamién pola so participación nel grupu "lliberdón" y que ye l'alma d'estos alcuentros y de la recuperación d'esti instrumentu tradicional, recoyendo tolos sos conocimientos nel llibru "La bandurria y el rabel" qu'asoleyó nel añu 2005.

Como tamién ye vezu, l'Alcuentru de bandurrieros ta abiertu a la participación d'aquelles persones que quieran participar tocando esti instrumentu.