La puya d’obres d’arte pola oficialidá algamó los 4.465 euros de recaudación

El Conceyu Abiertu pola Oficialidá celebró esti sábadu una primer puya poles obres d'arte espuestes n'amuesa "artistes pola oficialidá" na que más de 70 nomes de les plástiques asturianes apurren los sos trabayos de forma desinteresada col oxetivu de que los fondos que se consigan pola venta vaigan a beneficiu de los gastos de la plataforma a favor de la oficialidá de la lingua asturiana.

Más de 30 persones participaron na puya d'esti sábadu, primera de les dos que se van facer con motivu d'esta esposición. La segunda puya va ser el trés de xineru, de manera que, amás de puyar por gustu propiu, tamién puea, quien tenga interés, intentar facese con una obra d'arte pa regalala'l día de Reis. Nesta primer puya l'importe total que se recaudó algamó los 4.465 euros, siendo les obres poles que más se pagó ún trabayu del artista Fernando Alba y otra pieza de Bernardo Sanjurjo.


Les obres d'arte de la esposición "artistes pola oficialidá" puen vese na sala "Espaciu Astragal" del Conseyu de Mocedá de Xixón. Asturies.com apurre a los sos llectores esta galería de semeyes con delles de les obres espuestes y a la venta dientro d'esta esposición qu'axunta arte y reivindicación.