La primer foca de cascu asturiana sal alantre

La foca de cascu que nació esti vienres na playa tapiega de Serantes ta en perfectes condiciones, según comentó esta mañana'l director del Centru d'Estudiu y Protección de les Especies Marítimes (Cepesma) Luis Laria, que ta siguiendo'l desenvolvimientu del animal, casu únicu n'Asturies. Laria esplicó que la foquina y la madre van separtándose adulces de la costa dende ayeri, como ye normal que pase nesta especie de magar la cría ye quien a somorguiase y nadar con soltura, y declaró con alegría que la foquina presenta un estáu de salú mui bonu.

Luis Laria namás tien mieu a que la foquina o la madre puean enredase nun arte de pesca, anque'l Cepesma yá tien falao cola cofradía de pescadores local sobre'l tema. D'otra manera, sigue'l dispositivu de vixilancia pa siguir los movimientos de la familia d'esta especie de fócidos que suelen criar ente'l xelu del árticu.