La presión del turismu amenaza'l futuru de los Picos d'Europa

El fin de selmana del 10 y 11 de xunetu celebráronse en Cantabria los XIX Alcuentros pa la Conservación de los Picos d'Europa, cume ecoloxista na que tuvieron grupos conservacionistes y montañeros d'Asturies, Cantabria y Castiella y Llión, como l'Asociación Asturiana d'Amigos de la Naturaleza, l'Asociación de Guardes Rurales d'Asturies o l'Asociación pa la Defensa de los Recursos Naturales de Cantabria, ente otros. L'axenda a tratar tocaba dellos temes de gran importancia, dende la cesión de la xestión del Parque Natural a les Comunidaes Autónomes hasta la situación d'especies como'l llobu, anque otru de los temes más importantes foi el futuru desarrollu d'infraestructures en terrén de Parques Naturales, cola pantasma de la posible estación d'esquí en San Glorio (en territoriu de Palencia, Llión y Santander alitando tres de l'acabante d'aprobar en Puirtu Braña (Ayer).

En cuantes a la xestión del Parque Nacional, los grupose coloxistes alcordaron pidir que nun se tresfiera la xestión del mesmu a les Comunidaes Autónomes. La razón pa ello ye que l'estáu supón una "visión técnica" adicional y tamién un axente mediador que pue amenorgar les tensiones y presiones sobre les alministraciones locales, como se vió nel casu de los llobos, onde los alcaldes concueyen dafechu colos intereses de los ganaderos contra los planes de conservación de la especie. Los grupos firmantes del manifiestu entienden qu'el trespasu del estáua les autonomíes ye entovía más grave nel casu de los Picos d'Europa, únicu Parque Nacional d'España que comparten delles autónomíes, lo que pue acabar col criteriu d'unidá de xestión

Los socesos del 27 de mayu, cuando funcionarios del parque mataron a siete llobercos acabantes de ñacer, merecen tamién una valoración por parte de los grupos ecoloxistes, que tienen pa ellos qu'esto nun ye una actuación estraordinaria nin un casu raru. La falta de plan de xestión de la especie, la falta de seriedá nos censos de población y l'oportunismu nos partes de daños al ganáu son delles de les irregularidaes que sorrayen los grupos ecoloxistes nesti particular. Los grupos firmantes esixen la creación del plan de Xestión de la Especie y llamenten que'l Ministeriu de Mediu Ambiente nun actuare contra los responsables del casu. Xunta ello, y p'acabar la polémica colos ganaderos, pídese tamién un nuevu sistema de xestión de la evaluación de los daños al ganáu y de sistemes de pagu más sueltos que desanicien los plazos d'hasta dos años nel pagu que se dan agora y que xeneren más rocea pa contra'l llobu

El tercer puntu de les conclusiones dedícase a solicitar una meyora na xestión del parque. Sobre esti puntu, denúnciase que'l Plan Rector d'Usu y Xestión entovía nun s'aplica y que sigue ensin facese'l de desarrollu sostenible nin el de Réxime económicu y de compensaciones. Igualmente, pídese-y al executuvu acabante nomar nel Ministeriu de Mediu Ambiente que-yos dea vida a los órganos de xestión del parque, que lleven en dellos casos, tiempu ensin facer reunión nenguna

Sicasí, el puntu más importante de les conclusiones alvierte sobre la masificación d'infraestructures en Parque. El documentu del Plan de tresportes pa los Picos d'Europa del Principáu d'Asturies supón pa los intereses conservacionistes un plan que "postula fórmules nueves y equipamientos pa incrementar la masificación del parque" casu de les 200 places, d'aparcamientu nueves que quieren ponese en Poncebos y 500 más en Cuadonga, sorrayando'l papel, cada vegada más turísticu y menosde serviciu, que se-y quier dar al funicular de Bulnes.

El tema de les infraestructures de tresportes lleva a falar de les deportives, una cuestión qu'ocupa a tola cordillera cantábrica. El proyectu d'estación San Glorio y el proyectu de
"Fuentes de Invierno", dambes na Cordillera y la primera muy allegada al parque nacional, sepártense radicalmente de tolos oxetivos de desarrollu sostenible según los grupos ecoloxistes, que ven nelles un inttentu d'especulación urbanística y un posible fracasu económicu en cuantes que nun garanticen beneficios a llargu plazu pol efectu de la perda de ñeve deriváu del cambiu climáticu.