La presidenta del CMPA diz que Mocedá asítiase nel “conformismu radical”

Depués de que la presidenta del Conseyu de la Mocedá del Principáu d'Asturies (CMPA) Rebeca Rodriguez diere una rueda de prensa pidiendo la dimisión de la xefa del Institutu Asturianu de Mocedá por "desaniciar les polítiques de mocedá" la rempuesta de la tiular de Mocedá Carmen Barrera foi dura y cortó pela freba negando toles acusaciones de Rebeca Rodríguez.

Según Carmen Barrera, la venta de la sede del Institutu de la Mocedá ye responsabilidá de la Dirección de Patrimoniu dependiente de la Conseyería d'Economía, mientres que l'acusación de despaición del programa p'artistes mozos qu'abandera la Sala Borrón nun ye tal en cuantes que se ta mirando de poné-y a la sala otra sede más afayadiza nel centru de la ciudá d'Uviéu. Sobre los recortes de programes d'ayuda a la mocedá Barrera negó qu'hubiere tisoria nos programes y aseguró que se ta dando una xuba de los presupuestos en toles estayes.

Dende'l CMPA nun tan d'alcuerdu coles esplicaciones de Carmen Barrera y acusen a la directora de Mocedá d'echar la pelota nel teyáu d'otra conseyería nel asuntu de la venta de la sede, mientres que programes como'l de "Campos de Trabayu" tendríen mengües grandes de financiación pasando de 72.000 euros nel 2002 a 36.000 nel 2005, mientres que les actividaes de les oficines d'información xuvenil presenten, según los datos del CMPA, xubes perbaxo del IPC.

Más allá del debate de cifres, pa la presidenta del CMPA rescampla que la Directora de Mocedá s'asitie "nel conformismu radical énte una situación tan gafa pa la mocedá asturiana" acusándola de vivir "ocecada n'alministrar limosnes" cuando tendría de ser quien llevare alantre "polítiques atrevíes pa la mocedá y esixir una financiación pública grande de manera que s'ayudare a iguar los problemes d'una mocedá que presenta tases de paru del 27% de media".