La presencia del asturianu na TPA anguaño, suficiente pa Ciudadanos

|
Susana Fernández Álvarez

La formación naranxa, que diz defender la Llei d'Usu y Promoción, refuga la esistencia d'informativos en llingua asturiana y afirma que "bablizar la TPA ye condenala al fracasu".

Susana Fernández Álvarez, vocera de Ciudadanos, sigue cola so política d'ataque continuu al asturianu. L'últimu episodiu foi ayeri, na Comisión de Control de Radiotelevisión del Principáu d'Asturies (RTPA), nel que comparecíen los candidatos a miembros del Conseyu d'Alministración nuevu del ente públicu.

Na fixación de posiciones señaló que "esperamos que naide quiera utilizar la RTPA como la puerta d'atrás a la normalización y a la obligatoriedá del asturianu, que nun algamó una mayoría nesti Parllamentu". Ciudadanos, que presume de defender la Llei d'Usu, contradizse apuntando que "vamos tar alerta, porque la televisión autonómica asturiana yá cumple suficientemente con un llabor de cohesión territorial y de difusión de la identidá asturiana, la tradición, los valores llingüísticos y de la cultura de la nuesa rexón. Nun aceptaremos cuotes nin porcentaxes de programación superiores a los actuales, nin muncho menos aceptar una intrusión del asturianu nos informativos".

Asina, aseguró que "bablizar la RTPA ye condelana al fracasu y al refugu social en beneficiu d'unos pocos, y con ello pondríamos en riesgu'l so futuru", pa lo que punxo l'exemplu de la ETB y IB3. Fernández Álvarez fixo referencia a una mayor audiencia de la canal en castellanu de l'autonómica vasca y una baxada na balear cola programación en catalán.

Propuesta d'Adolfo Camilo Díaz

Esta reación de la vocera de Ciudadanos llegó depués de la intervención d'Adolfo Camilo Díaz, propuestu pola FSA, que demandó una mayor presencia del asturianu na RTPA. "La llingua asturiana ha tener más y meyor presencia. 16 años depués nun podemos xustificar que nun haya informativos n'asturianu. Nun tien nin pies nin cabeza", dixera ente otres referencies al idioma y la cultura asturiana, al tiempu qu'entrugó "¿podemos permitinos el luxu de prescindir d'una televisión que nun sía n'asturianu?".

Nun foi la única intervención de defensa del asturianu na canal pública, yá qu'Alfonso Suárez Suárez, propuestu por Podemos; Norma Bernad y Carmen Veiga, pola FSA; o los diputaos Daniel Ripa y Ovidio Zapico, de Podemos y d'Asturies pela Izquierda (IX-IAS), de manera respeutiva, tamién amosaron postures favoratibles.

Contador Estadistiques