La Pola Siero celebra güei los Güevos Pintos

La Pola Siero celebra güei el día grande de la fiesta de los Güevos Pintos, una fiesta qu'enllena les cais de La Pola de tenderetes que venden güevos pintaos artesanalmente con toa triba de motivos, dende los relixosos a otros más profanos como les escenes de Pinón y Telva.

Nun se sabe seguro por qué esta fiesta, tan rara de ver en tola península, se celebra en Siero y tamién en Llangréu, pero ye bien fácil que'l so aniciu tenga que ver cola revolución industrial. Ello ye qu'a Siero y Llangréu, los dos conceyos en qu'entamó la minería moderno del carbón n'Asturies, llegaron nel sieglu XIX a trabayar na mina cantidá d'inxenieros y personal especializao d'otros llugares onde sí se fai la tradición de los güevos, asina que lo más seguro ye que la fiesta viniere con ellos

Llangréu celebró'l pasáu domingu y ayeri los sos güevos pintos, una fiesta na que la tonada asturiana foi protagonista, afitando una tradición de más de cien años que tien entovía más siguimientu y popularidá en Siero. Con motivu d'esta fiesta, la segunda más importante de Siero tres de la del Carmín, el grupu folclóricu y d'investigación "El Ventolín" va dedicar la so XXVIII Semana del folclore astur a los tradicionales cantares de chigre, siguiendo una iniciativa que yá se fexere n'otres ocasiones.