La Pola Ḷḷena celebra esta fin de selmana un amagüestu popular nel que va actuar Spanta la Xente

L’Asociación Puxando pol Carru, en collaboración con Rebalgu, entama esta fin de selmana un amagüestu popular en La Pola Ḷḷena. Ente les munches actividaes programaes pal vienres y el sábadu destaca l’actuación de Spanta la Xente.
 
Les persones que s’averen a Les Escueles (Jesús Neira) –onde va instalase un chigre y van entamase dellos talleres pa neños y neñes– van poder esfrutar de castañes y sidra del duernu dende’l vienres a les 17 hores. L’amagüestu va continuar el sábado a partir del meudía, cuando va abrise un mercáu artesanu y va tener llugar un pasucais de la Banda de Gaites Güestia. Media hora más tarde, l’escritor Dolfo Camilo Díaz va dar el pregón de la folixa, na que los más pequeños van tener protagonismu a lo llargo del día con talleres y xuegos.
 
A les 23.30 hores ta prevista l’actuación de Spanta la Xente, grupu llocal que ta celebrando’l so sestu aniversariu, pa depués dar pasu al sortéu de la cesta del amagüestu d’esti añu y acabar la nueche baillando al ritmu de la música d’un DJ. “Son una bayura coses que van dar vida a la villa mientres el día enteru”, señalen los organizadores, que tamién tienen la collaboración del Conciyu Ḷḷena, la Oficina d'Información Xuvenil (Juvelena), Radio Ḷḷena, el colexu Jesús Neira, el colexu Vital Aza y los comerciantes de la zona.