La población de llobos sigue nes cifres del 2021

Éstos son los datos de la especie nel 2023 en comparanza colos dos años últimos.

Asturies cuenta con 3 manaes de llobos más que nel 2022 al pasar de 40 a 43, de les que 39 son reproductores. Amás, en función de los indicios deteutaos, evalúase la posible esistencia d'otros trés grupos.

Son los datos del censu del 2023 presentaos pol Gobiernu, que se dieron a conocer esta tarde na xunta del Comité Consultivu del Plan de Xestión del Llobu. Sicasí, si miramos los del 2021, deteutamos que la cantidá ye la mesma, 43 llobaes, anque otru estudiu d'esi añu aumentábales hasta 46.

Pa la ellaboración d'esti estudiu analizáronse 56 árees y habilitáronse 1.224 estaciones d'escucha. El censu correspondiente a 2023 recueye tamién el númberu d'exemplares atopaos muertos, un total de 15, na so mayor parte por atropellos.

Anguaño'l llobu ta incluyíu nel Llistáu d'Especies Xabaces en Réxime de Proteición Especial (LEXPRE) dende'l 2021, polo que la normativa impide facer controles poblacionales.

Cifres d'ataques

Respeuto al balance de daños presentaos güei, los cánidos atacaron l'añu pasáu a 3.256 animales: 953 vaques, 227 cabres, 1.093 caballos, 976 oveyes y 7 perros. El Gobiernu abonará 1,1 millones d'euros pa compensar estes perdes, la cantidá más alta dende'l 1997, cuando entamaron los rexistros.

Semeya obra d'Arturo de Frias Marques. Imaxe baxo llicencia CC BY-SA 4.0 Deed.