La plataforma Contra la Represión y les Llibertaes convoca una nueva manifestación en Xixón

Dempués de conocese les sentencies de los dos xuicios contra los sindicalistes Cándido Carnero y Juan Manuel Martínez Morala polos daños materiales causaos nes movilizaciones del sector naval del añu 2005, la Plataforma contra la Represión y poles Llibertaes fizo pública ayeri la convocatoria d'una manifestación pal próximu día 29 de marzu. La marcha, que va salir a les 19.30 hores de la Plaza l'Umedal, convócase contra "la criminalización de la lucha obrera y social", y nella, amás del casu de Cándido y Morala, condenaos a trés años de prisión, tamién va protestase contra otres situaciones como la qu'afecta a la sindicalista Beatriz Quirós, condenada a 600 euros de multa por "retrasu al identificase énte la policía nuna protesta".

Los despedíos de Caxastur o los trabayadores del Hospital central contra los que cargó la policía nel trescursu d'una protesta pacífica foron otros de los casos mencionaos por Cándido y Morala, que presentaron públicamente la convocatoria de la marcha xunto con Beatriz Quirós y Miguel Ángel Llana. Morala faló d'una "fola de
Represión" y echó-y la culpa d'ella al delegáu del Gobiernu Antonio Trevín, mientres que Cándido Carnero retó públicamente a l'alcaldesa de Xixón y al teniente d'alcalde Jesús Montes Estrada a un debate públicu p'aclariar la responsabilidá del Ayuntamientu de Xixón na denuncia contra elli y Morala.