La organización nacionalista de mocedá Darréu llama a la movilización nel 8 de setiembre

La organización nacionalista moza Darréu, venceyada al partíu políticu Andecha Astur, fizo un llamáu a la participación na manifestación qu'esta formación política tien preparada pal Día d'Asturies, 8 de setiembre, y que va salir de la Estación de la Renfe d'Uviéu a la 1 de la tarde. Darreu cumple esi día los sos dos primeros años d'esistencia, de los que fai una valoración "perpositiva" y con motivu d'ello va presentar dellos materiales y actos nuevos. Pa n'acabando la manifestación, Darréu tien preparada una espicha popular na que va presentase'l nuevu númberu de la revista "írguite" qu'edita la organización y na que va presentar tamién los actos de la xornada de conmemoración de la Revolución Asturiana de 1934 que Darréu tienpreparaos pal día 7 d'ochobre en La Felguera (Llangréu).

Darréu xustifica la manifestación del 8 setiembre como una ocasión "pa denunciar que se nos nieguen derechos básicos como la oficialidá o l'autodetermín" y otres situaciones qu'afecten de manera específica a la mocedá, casu de la emigración, la esplotación llaboral o la falta d'accesu a una vivienda" factores que lleven a Darréu a atalantar que la situación política n'Asturies ye "predemocrática".