La oficina de Política Llingüística va tener el mesmu estatus que na pasada llexislatura

La Conseyería de Cultura va siguir contando nesta llexislatura con una Dirección Xeneral de Promoción Cultural y Política Llingüística de la que va depender una Oficina de Política Llingüística. Repítese d'esta manera la estructura organizativa de la Conseyería na pasada llexislatura, anque entovía ta por conocese quien va ocupar los cargos, en cuantes que l'únicu seguru ye'l de la titular de la Conseyería, Encarnación Rodríguez Cañas.

Anque la selmana pasada sonó'l nome de Consuelo Vega pa ocupar la Dirección Xeneral, nun hai entovía confirmación oficial sobre esti nomamientu nin sobre'l del titular la Oficina de Política Llingüística, que n'anterior llexislatura ocupó Ramón d'Andrés y que nun quixo confirmar nin desmentir a esti mediu la so posible continuidá nel puestu.

Según l'organigrama dau a conocer ayeri pol Gobiernu, qu'aprobó amás de la de Cultura les estructures de les conseyeríes d'Alministraciones Públiques, Educación y Ciencia, Cultura y Turismu, Bienestar Social, Salú, Infraestructures, Política Territorial y Vivienda y Mediu Ambiente y Desarrollu Rural, el llabor de la Dirección Xeneral de Promoción Cultural y Política Llingüística va ser "la dirección de les árees relatives a la xestión de servicios culturales, infraestructures culturales, promoción y cooperación cultural, y les de biblioteques" pero acuta aparte que "correspuende amás a esta Dirección Xeneral, la planificación, execución, coordinación con otres alministraciones, control y evaluación de los programes necesarios pal desarrollu d'una política llingüística que garantice y normalice socialmente l'usu del bable/asturianu y la so protección, promoción y difusión".