La obra ‘Muyerines’, de Santa Bárbara, abre’l XXII Salón de Teatru Costumista Asturianu de Candás

Dende esti miércoles y hasta’l 2 de setiembre, el Teatru Prendes va acoyer el XXII Salón de Teatru Costumista de Candás. ‘Muyerines’, de Santa Bárbara Teatro, va abrir esti ciclu compuestu por 12 obres d’otres tantes compañíes asturianes.
 
Seis de les doces funciones programaes van ser estrenos, como ye’l casu de ‘Muyerines’, que namái pudo vese’l 4 d’agostu pasáu nel colexu de Llaranes, población d’onde ye orixinariu el grupu Santa Bárbara. El restu d’obres que van contemplase per primer vegada nes tables del Teatru Prendes son ‘L’atracu’, del Grupu de Teatru Rosario Trabanco (día 24); ‘Drácula ye teverganu’, de Chanclos Asgaya (día 26); ‘El abeyón’, de Xana (día 30); ‘Ni contigo ni sin ti’, del Grupu de Teatru Traslluz (día 1); y ‘Desgraciaronme la fia’, de l’Agrupación Artístico-Cultural Padre Coll (día 2). Amás, ‘La Cruz de Ceares’ va reestrenar el llunes 27 la obra ‘No gana uno pa sustos’. Toles representaciones van principiar a les 23 hores y tienen un preciu de 5,50 euros, 3 nel casu de los socios del Prendes. La venta d’entraes va abrise una hora enantes del entamu de la función.
 
Santa Bárbara Teatro protagoniza la primer xornada del XXII Salón de Teatru Costumista de Candás, un eventu que ye un ésitu de públicu en toles sos ediciones. La obra cola que los de Llaranes participen esti añu ye una de creación nueva nomada ‘Muyerines’, escrita por Carmen Campo Mier. Trátase d’una comedia de dos actos en llingua asturiana que cuenta la historia de cuatro muyeres que queden güerfanes y pasen a vivir coles sos tíes, chocando con elles en dellos aspeutos. Mañana’l turnu va ser pal grupu Penedo Abayón, de Bual, que va representar ‘Pago eu (o dalgo mui gordo)’.
 
Premios Aurora Sánchez
 
Tres la celebración del salón, el vienres 7 de setiembre ta prevista la entrega de los premios Aurora Sánchez de teatru costumista asturianu, qu’esti añu viven la so décima edición. Por esti motivu, va celebrase la III Gala de los Aurora, con un espectáculu d’humor que tien el nome de ‘Galablanca’. La ceremonia va dar entamu a les 20 hores.
 
Na semeya, los componentes de Santa Bárbara Teatro.