La música asturiana axúntase pa recaudar perres pal Valledor, zona arrasada pol fueu n’ochobre

Esti sábadu va tener llugar un conciertu en Siero pa recaudar perres pal Valledor, parroquia d’Ayande arrasada pol fueu n’ochobre. La Coḷḷá Propinde, Tuenda, Héctor Braga, Anabel Santiago y Spanta la Xente collaboren nesta gala.

Na mañana del 23 d’ochobre pasáu, entamó un fueu nesta zona del occidente asturianu que, yá pela tarde, fíxose incontrolable. Les raches d’aire 110 quilómetros por hora provocaron qu’un focu pequeñu d’incendiu tornara en desgracia pa esta parroquia d’Ayande. El resultáu foi 2.108 hectárees quemaes, siete viviendes arrasaes pol fueu y momentos complicaos pa los vecinos y profesionales d’esta parroquia. Cola intención d’ayudalos económicamente y recuperar el valle, dellos artistes y bandes de la música asturiana axúntanse al rodiu d’una iniciativa entamada pola Asociación pa la Recuperación de Los Sidros y Les Comedies ‘El Cencerru’, con muncha rellación col Valledor por mor de les mazcaraes, y Amigos de Fonteta, que va tener llugar mañana en Siero.

‘Recuperar el Valledor’ ye’l nome de la gala solidaria que va principiar a les 19.30 hores nel Teatru Audiotoriu de La Pola, na que tienen confirmada la so asistencia La Coḷḷá Propinde, Tuenda, Héctor Braga y la Bandina’l Bache, Anabel Santiago y Spanta la Xente. Van presentar l’eventu, onde nun van a faltar la presencia de Los Sidros y Les Comedies de Valdesoto, Xosé Antón ‘Ambás’ y Esther Fonseca. La entrada ye llibre y van ponese delles huches a disposición del públicu pa que puedan dar los sos donativos pa la causa.

Comparte...                                    

Enllaz permanente