“La izquierda resiste n’Asturies”, rescampla Adrián Barbón

|
Adrián Barbón intervención 28-M

El ganador de les eleiciones nacionales del 28-M, Adrián Barbón, dio les sos primeres declaraciones sobre'l resultáu eleutoral pasada la medianueche. “Asturies resiste como esi focu de resistencia de polítiques progresistes y de polítiques qu’apuesten pola igualdá”, apuntó’l líder de la Federación Socialista Asturiana (FSA-PSOE), que volverá a presidir el Gobiernu nesta llexislatura viniente, la segunda pal llavianés.

Mayor porcentaxe de votu, más votos y un diputáu menos, de 20 a 19, por “una concentración del votu de centroderecha”. Barbón celebró “que la izquierda llogró construyir una muria pa impedir que VOX marque les polítiques” y “el so accesu al Gobiernu d’Asturies, que yera lo que pretendíen”.

Entamaba la so intervención el llavianés dando les gracies y apuntando que “nun yeren unes eleiciones fáciles y sabíamoslo dende’l primer minutu”. “Ye un contestu totalmente diferente al del añu 2019” cuando “teníamos vientu de cara”, pero “magar tener el vientu de frente, magar tola campaña que s’entamó pa crear una burbuya mediática al rodiu de ciertos candidatos lo cierto ye que tenemos un porcentaxe de votu mayor que’l que teníamos va cuatro años” al pasar d’un 35,25 por cientu a un 36,50 col 98,40 por cientu del votu escrutáu.

“Nuna deriva xeneral como lo que tamos viendo –de claru xiru hacia la derecha–, lo cierto ye que la izquierda resiste n’Asturies”, rescampló Barbón, qu’añadió que “resiste como esi focu de resistencia de polítiques progresistes y de polítiques qu’apuesten pola igualdá”. “Vamos trabayar pa que nos próximos años haya estabilidá política y poner al serviciu d’Asturies la esperiencia de gobiernu”, aseguró.

“Equí nun termina nada, equí entama too”, siguió’l llavianés, que señaló que llueu d’una “llexislatura atípica, na próxima hai qu’esparder y ser quien a treslladar tolo que significa’l cambiu social d’Asturies; l’afondamientu de la nuesa identidá, la nuesa cultura, de los nuesos valores, de la revindicación de la igualdá; de pensar nes persones más vulnerables; de tener y poner enriba la mesa les preocupaciones principales de caún de los coleutivos”.

Pa finar, fixo referencia a la necesidá de “estabilidá política pa cambiar por completu la nuesa economía; pa ser una economía verde, dixital y sostenible; pa desendolcar y poner en funcionamientu les grandes infraestructures d’Asturies; y sobre manera pa qu’Asturies dexe de tar pensando pesimistamente nel so pasáu y entamemos a abordar los retos del futuru”.

Canga celebra que nun se dean los númberos pa la declaración d’oficialidá

El candidatu del Partido Popular (PP), Diego Canga, líder de la oposición con 17 diputaos –7 más que los rexistraos polos populares nel 2019 con Teresa Mallada– que nun pierde esperanza en que’l votu emigrante pueda facer baillar un escañu y algamar un empate, esclamó que “acabo l’apisonadora socialista n’Asturies” y festexó que “pa cualquier reforma del Estatutu hai que contar col PP”. “Y eso significa que nun habrá cooficialidá nos próximos cuatro años”, añadió.

Contador Estadistiques