La izquierda asturianista diz sí a la Fuelga Xeneral

Abaratamientu del despidu, conxelación de les pensiones, recortes llaborales y sociales… son dalgunes causes que lleven a la fuelga xeneral del 29-S. La izquierda asturianista tamién va movilizase, porque tien daqué que dicir.

L’ambiente previu a una fuelga xeneral ta viviéndose estos díes peles cais: pintaes llamando a la fuelga, pancartes, repartu de panfletos, refugu de la patronal asturiana, crítiques a los sindicatos mayoritarios, posicionamientu a favor de diputaos asturianos… Mañana, a la fin, van resolvese les quinieles sobre’l fracasu o’l éxitu de la fuelga.

“El problema ye que si esta fuelga fracasa CC.OO. y UXT van siguir esistiendo, pero la reforma llaboral y los recortes tamién” opina Faustino Zapico, portavoz d’Unidá Nacionalista Asturiana, argumentando que si’l 29-S hai un fracasu s’abre la puerta a nuevos recortes. Mariu Arbesú, secretariu d’organización d’Andecha Astur, y Rafael Palacios, portavoz del Bloque por Asturies, tamién llamen a la movilización, anque con diferentes espectatives. Arbesú piensa que la convocatoria “será un fracasu por como ta planteada” y Palacios ye optimista en cuantes al posible éxitu.

Pesie a les diferencies, les trés organizaciones de la izquierda nacionalista tienen un puntu d’alcuentru; el compartir qu’Asturies sufre una “crisis crónica”, como resaltó Zapico, y el denunciar que l’axuste impuestu pol Gobiernu español foi más duru n’Asturies pola “complicidá de les sucursales de PSOE, PP y IX”, como recalcó Arbesú. La consecuencia ye nidia pa Palacios: “Vamos tener una xeneración que va tener piores condiciones llaborales que los pás y los güelos”, sentenció’l portavoz del BA.

Movilizaciones diferentes
UNA, Bloque por Asturies y Andecha Astur van salir a la cai el 29 de setiembre a defender los derechos de los trabayadores, pero non toles organizaciones van movese nel mesmu camín. “Vamos a participar nos actos y movilizaciones que defienden los intereses d'Asturies criticamente colos sindicatos convocantes de la fuelga”, señala Mariu Arbesú que tacha a CC.OO y UXT de ser “tamién responsables de la situación que carez Asturies”. D’esi mou, la so formación va sofitar la concentración que convoca l’Ensame República Asturiana pal martes 28 y la manifestación de la CSI en Xixón.

Faustino Zapico ye críticu col sindicalismu mayoritariu. Plantea que “la dependencia económica de la financiación pública acaba afogando l'espíritu sindical” y que “CC.OO y UXT tán tan faltos d'imaxinación, tán tan presos del discursu lliberal que nun son quien a atrevese a plantegar una alternativa”. Sobre la participación d’UNA, afirma que la so militancia “va participar nos piquetes y nes manifestaciones entamaes pa esi día”.

D’otra banda, Rafa Palacios apela a “la unidá, a la movilización y a la llucha de la sociedá asturiana contra les polítiques antisociales”. Asina ye que’l BA va participar nes manifestaciones de Xixón y Uviéu. Pa él les valoraciones vendrán dempués del 29-S, agora pide “movilizase y lluchar contra les midíes antisociales del Gobiernu d’España, del Gobiernu del Principáu y de la Patronal”.

Respuestes asturianes a la crisis
Pero non too son crítiques, la izquierda asturianista tamién plantea respuestes propies la crisis, con propuestes alternatives a les desendolcaes polos partíos mayoritarios. “Una crisis como esta pue combatise nos sos síntomes o nes sos causes”, señala’l portavoz d’UNA, argumentando que “nes sos causes implica unes tresformaciones sociales que perpasen el marcu capitalista de producción y consumu”. Mariu Arbesú d’AA tamién va al raigañu del problema y plantea “cualquier política encaminada a que los asturianos autoxestionen la economia asturiana. Dexar de ser una colonia económica d'España”.

“Incrementar los ingresos a partir d´una reforma fiscal que termine de verdá col fraude, verdadera progresividá fiscal, recuperar l´impuestu del patrimoniu, acabar colos chiringuitos del réximen, eliminar gastos suplerfluos”, son dalgunes de les soluciones espuestes por Rafa Palacios. Faustino Zapico tamién comparte estes midíes, señala que nun hai condiciones pa combatir les causes y algunes alternatives a los síntomes son “la nacionalización de los bancos en crisis y, nel ámbitu competencial asturianu, el cambiu radical del modelu enerxéticu, depredador y que nun xenera riqueza nin empléu”.

Otres formes de movilización
Abondes voces sociales comparten que’l prósimu 29 de setiembre va xugase mui seriamente’l futuru de los derechos sociales y llaborales. Sicasí, esta convocatoria de fuelga xeneral vien con muncho descréditu pola situación de los sindicatos mayoritarios, les midíes d’una supuesta izquierda qu’impón recetes neolliberales y, como telón de fonu, un sociedá más individualista y mui desmovilizada socialmente.

“Hai una campaña mui fuerte pa qu'esta fuelga seya un fracasu”, resaltó Faustino Zapico. Parte d’esa campaña ye la crítica de ciertos sectores de que la fuelga como vía de movilización yá nun sirve. ¿Hai alternatives a la fuelga?, la izquierda asturianista diz sí al caltenimientu de la fuelga como respuesta de presión, pero tamién aporta otru tipu d’acciones.

“Movilización permanente; trabayar un día sí y otru tamién pa intentar camudar la situación que carez Asturies”, opina Mariu Arbesú. “Otres formes de movilización qu'impliquen tamién a la población non activo, como boicots, fuelgues de consumu, manifestaciones, asamblees ciudadanes…” señala Zapico, mentantu que Rafa Palacios considera “fundamentales pa siguir creciendo la pluralidá de propuestes y la diversidá d´alternatives”.

Tirar los dados
El miércoles 29 de setiembre va vivise la primer xornada de fuelga xeneral nel Estáu español en 8 años. Les evidencies nun se pueden negar y, pa bien o pa mal, ehí tán unos recortes enmarcaos dientro d’una crisis internacional que tán pagando los sectores sociales con menos poder. Movilizase o non ye la llibre decisión de cadún. Sacantes el PAS, tol nacionalismu asturianu movio yá ficha. Agora tocá-y tirar los dados a los ciudadanos.
 

Comparte...                                    

Enllaz permanente