La guerra tira p’abaxo poles cotizaciones

Con ganancies mínimes acabó la selmana'l selectivu Ibex-35 dientro d´un ambiente de mieu xeneralizao a que la guerra vaya pa llargo coles peligroses xubes del preciu del petróleu qu´ello trae. L'otru vienres, l´Ibex asitióse nos 6.029 puntos con un probetayu avance del 0,1% colo que'l riesgu de perda del soporte de los 6.000 ye pergrande en cuantes que les noticies que vienen d´Irak nun son bones pal llau de los invasores. El volume de negociu na Bolsa de Madrid sigue siendo mui baxu, moviendo'l vienres sobre 1.200 millones d´euros, y ello ye pol riesgu d'una fuerte recesión económica como consecuencia del conflictu bélicu. En resume, la bolsa española reculó un 3,7% na selmana, anque hebo dellos repuntes téunicos en que los inversores pudieron tomar posiciones en valores atractivos como dellos de la banca y eléctricos. Muncha prudencia y volatilidá marcaron los mercaos esta selmana.



La selmana tampoco nun pintó bien pal restu de places europees. N´Alemaña'l Dax resbaló cola mala recalificación bursátil de l'aseguradora Munich Re, que cayó'l 10%. Otros grandes valores europeos cayeron con gana, casu de KLM, Hilton, Air France o Accor. Nos Estaos Xuníos los mercaos tampoco nun pintaron bien pa los inversores de Wall Street, anque otros indicadores sí que-y dieron fuelgu al mercáu, casu del esperáu índiz de confianza de la Universidá de Michigan, que marcó'l 77,6% cuando los analistes contaben col 75%, ello mientres nel vieyu continente nun pararon de salir datos negativos: xubes xeneralizaes del paru y la de los precios de producción de Francia xunta l'anuncia del gobiernu francés de baxada de previsiones del crecimientu del PIB, una anuncia que de xuro van facer otros países.

Ensin dulda, la noticia del pieslle foi la multa por evasión fiscal al primer bancu alemán. El Deustche Bank va tener que pagar 59,3 millones d´euros por nun cotizar impuestos ente'l 1992 y el 1996. Dempués d´investigar a 800 emplegaos de la entidá financiera, la fiscalía alemana descubrió que´l bancu yera cómplice de tresferencies anónimes al extranxeru pa evadir impuestos. El bancu aceptó la conderga pola que amás dellos emplegaos tienen que poner del bolsu d'ellos 4,5 millones d´euros.

Los valores rellacionaos col turismu tan sofriendo pol conflictu, llegando comentar los analistes qu'esta selmana va declarase en quiebra una importante aerolínea norteamericana. Nel mercáu español valores como Sol Meliá, Iberia y NH Hoteles perdieron asgaya la selmana pasada. Otramiente Endesa, SCH, BBVA y Telefónica tuvieron delles oscilaciones mientres que la bona acoyida por parte de los inversores de los avances de les investigaciones de la biotecnolóxica Zeltia ficieron que xubiere más d´un 4%. Estes xubes de la gallega coinciden siempre cola cellebración de congresos mundiales onde la casa presenta los resultaos de les sos investigaciones en fármacos pal cáncer. La prósima cita ye nel Congresu Mundial en Toronto la primer selmana d´Abril.

La moneda europea y el Brent tan beneficiándose anguaño de la inestabilidá xeopolítica y de la debilidá económica pa xubir más. L'euru anda pelos 1,07 dólares y el barril Brent cotízase penriba de los 27 dólares. Esta importante xuba nel preciu del petróleu embúrriala en parte la guerra civil en Nixeria, país productor de petróleu onde la petrolera Shell dio anuncia de que tenía recortar la producción de 700.000 barriles al día a 500.000.