La Generalitat contradiz a Migoya

Directores de Política llingüística y cargos de toa triba asistieron al alcuentru sobre llingües minoritaries de Barcelona, al que la Conseyera de cultura asturiana nun asistió por tener problemes d'axenda y del que nun dio parte a otros cargos de la so conseyería argumentando que sólo podíen asistir "conseyeros o viceconseyeros" como se dixo a medios de comunicación dende'l so gabinete

La llista d'asistentes a la primer Xornada Sobre la Regulación del usu de les Llingües nel Estáu, que s'organizó'l pasáu xueves en Barcelona col envís d'analizar una futura llei de llingües del estáu español, contó con cargos políticos de tolos rangos en representación de los sos respectivos gobiernos. Según esplicaron a Asturies.com dende la oficina de protocolu de Josep Bargalló, les invitaciones ficiéronse, efectivamente, a los conseyeros de les comunidaes autónomes, pero con llibertá pa que caún d'ellos delegare nes persones que-yos abultaren afayadices, como bien d'ellos ficieron efectivamente.

La llista completa de cargos políticos qu'asistieron a la histórica reunión de Barcelona inclúi polo tanto a viceconseyeros, casu del de Política Llingüística d'Euskadi, Patxi Goneaga, pero ello ye qu'esti foi a la xunta acompañáu d'Oscar Azkona, que tien el cargu de "asesor en llingües de la Viceconseyería de Política Llingüística del Gobiernu Vascu " y de Miren Mateo, "directora de Coordinación de la Viceconseyería de Política Llingüística vasca". Pela so parte, la representación gallega namás incluyía pela parte política a Xesús Pablo González, Director Xeneral de Política Llingüística de la Xunta de Galicia, un cargu equivalente en rangu al de Carlos Madera, neto que nel casu de Miquel Melià, que namás ye Director Xeneral de Política Llingüística del Gobiernu de les Islles Baleares, mientres que pela parte aragonesa asistieron Juan José Vázquez, viceconseyeru d'Educación, Cultura y Deportes del Gobiernu d'Aragón, y Carmen Alcover, técnica en polítiques llingüístiques. Lóxicamente, la representación catalana foi la más numberosa, y contó con Antoni Mir, secretariu de Política Llingüística de la Generalitat de Catalunya, Miquel Pueyo, director de Planificación Llingüística, Elisabet Samarra, técnica de la Secretaria de Política Llingüística, Joan Ramon Solé, xefe de la de la sección d'Estudios de la Secretaria de Política Llingüística de la Generalitat y Jaume Vernet, miembru del Conseyu Consultivu de la Generalitat, amás del propiu Conseller en cap Josep Bargalló, anfitrión del alcuentru.

Pela parte de les academies llingüístiques, los asistentes foron Andrés Urrutia, académicu numberariu de l'Euskaltzaindia, Manuel González, secretariu de la Real Academia Galega, Roberto González-Quevedo, secretariu de l'Academia de la Llingua Asturiana y Josep Laporte, presidente del Institut d'Estudis Catalans.

Sobre l'asuntu, el Director de la Oficina de Política Llingüística Ramón d'Andrés declaró qu'esto ye un casu de "desidia y desdexamientu" por parte de la Conseyera y quexóse de que nun se-y diere parte de la esistencia de la reunión porque "siempre se pue delegar". D'Andrés espresó a Asturies.com qu'esto "nun se pue repetir" y fizo promesa de que "el Gobiernu d'Asturies va tar nes siguientes reuniones que se faigan" d'esti marcu de debate entamáu pol Gobiernu catalán