La Fura dels Baus presenta en Xixón el so espectáculu 'Imperium'

Siete muyeres van pone-y cara a la violencia en 'Imperium', l'espectáculu nuevu de la 'Fura dels Baus', qu'avera a Xixón la so xira güei y mañana, 10 y 11 d'ochobre. La obra va representase nel Pabellón de les Naciones del recintu de la Feria de Muestres a les 21.00 hores.

Marta Roca, una de les actrices del espectáculu defínelu como un intentu de narrar el clima de violencia actual y criticar la "falta de diálogu". "Ye un viaxe de sensaciones", añadió otra de les actrices, Lola López Luna, quien destacó que la compañía vuelve a la "llingua forera", con un teatru d'acciones.

Según les actrices, l'espectador vese metíu nel espectáculu, ya que tien de movese y buscar l'aición. "Cada públicu va ver la parte que quiera ver", apuntó López Luna con alusión a que l'espectador ta de pie, alredor d'una gran pirámide na que se ve la representación de l'aición. El pabellón qu'alberga l'espectáculu tien capacidá pa entre 700 y 1.000 persones.

Roca esplicó que la puesta n'escena entama col terrorismu, que crea'l "estilu del mieu", del que se desencadenen tres aiciones: la hedonista, l'activista y la moderada. D'ésta última va surdir la domesticación de les siguidores, tanto pola violencia física como la moral. "El ritmu de violencia rápidu dase un descansu, dase pasu a la belleza del cuerpu de la muyer", dixo. Ye entós onde les siguidores asumen tolo aprendío y deciden implicase no que fueron domesticaes, ye decir, la violencia, enantes de descubrir que fueron engañaes pol abusu de poder. Nesi momentu, según Roca, a la masa nun-y importa'l diálogu nin la razón, y aplica'l "güeyu por güeyu", dando llugar al fratricidiu. L'actriz señaló que la escena ta insipirada nel cuadru del fratricidiu de Goya. "El final ye la culminación de la violencia, cuando toles muyeres tán muertes", apuntó. Roca indicó que se trata d'una narración de tipu visual y musical, na qu'escenografía, música y testu tán nel mesmu planu.