La Fundación Caveda y Nava va recibir a Javier Maqua

Como ye tradición tolos años per esti tiempu, la Fundación Caveda y Nava va facer la so xornada na que se reconoz como patronu de la mesma a dalguna persona de relevancia social o cultural qu'espresa'l so apoyu a favor de un consensu de mínimos a favor del asturianu, como ye l'oxetivu de l'asociación, un distingu que va dir esti añu pal director de cine Javier Maqua, en reconocimientu al papel normalizador de los medios audiovisuales. L'actu va celebrase nel monesteriu de Santa María de Valdediós (Villaviciosa) el sábadu 1 d'avientu a les 12:00 hores. Cola concesión d'esti títulu, la fundación quier reconocer el papel normalizador de los medios audiovisuales. Darréu del actu en monesteriu, los miembros de la Fundación van trslladase a Villaviciosa pa facer l'homenaxe floral a Xosé Caveda y Nava.

Javier Maqua (Madrid, 1945) vien por parte de padre de la familia Maqua González del Valle d'Avilés, una villa a la que'l director confiesa tener munchu cariñu. Biólogu que nunca quixo exercer la so profesión, dedicóse a munches facetes de la cultura, destacando pola so trayectoria en Radio 3.

Como director de cine, el nome de Javier Maqua foi reconocíu pola película
«Carne de gallina», rodada nel añu 2002 nel conceyu de Mieres cola participación del asturianu Maxi Rodríguez, responsable xunto a Maqua del guión del filme. D'esta película, precisamente, la Fundación Caveda y Nava asegura que «contribuyó a popularizar y normalizar la presencia de la llingua asturiana nel ámbitu audiovisual». Per otra parte, nel marcu de la XXVII Selmana de les Lletres Asturianes celebrada nel añu 2006, Maqua produxo la pieza n'asturianu «Guor», editada nel DVD «Pieces», onde tamién s'inclúi «De la vida de les piedres» de Ramón Lluís Bande.

Ente los patronos d'Honor de la Fundación Caveda y Nava alcuéntrense l'arzobispu eméritu d'Uviéu, Gabino Díaz Merchán, la presidenta del PP de Xixón, Pilar Fernández Pardo, l'ex-alcalde socialista de L.lena Hugo Morán o el futbolista retiráu del Sporting de Xixón Enrique Castro "Quini".