La Fundación Príncipe d’Asturies premia a la Fundación Bill y Melinda Gates

Bill Gates, presidente de la compañía informática Microsoft y una de les mayores fortunes particulares del mundu, llevó'l premiu a la Cooperación Internacional xunto cola so muyer Melinda pol llabor de la so fundación benéfica.

La Fundación Bill y Melinda Gates, que trabaya pa desaniciar enfermedaes como la malaria o'l SIDA n'África, ye obra de Bill Gates, fundador y presidente de Microsoft y ún de los personaxes más ricos del planeta. Nacíu en Seattle nel añu 1955, Gates estudió en Harvard y creó nos años 70 una primer versión del sistema operativu MS2, fundando nel añu 1975 la empresa Microsoft, que desarrolló'l MS2 hasta facelu'l sistema operativu de los ordenadores IBM. Cola creación del primer sistema Windows nos años 80 Gates afitó la posición de dominiu absolutu de los sos sistemes operativos nel mundu de la informática. Pela so parte Melinda Gates, casada col presidente de Microsoft y antigua trabayadora de la empresa, nació en Dallas, Texas nel 1964, siendo diplomada n'Informática y máster n'Alministración d'Empreses pola Universidá de Duke. En Microsoft llegó a tener el cargu de directora xeneral de márketing nel añu 1996.

Nel añu 2000 los dos crearon la Fundación Bill y Melinda Gates que tien por finxu apurrir ayuda en sanidá y educación a los más desfavorecíos y que lleva invertíos nos últimos años más de 10.000 millones de dólares en proyectos de cooperación e investigación médica , centrando les más de les sos acciones n'África y Asia.

La fundación de Gates impúsose na final pol premiu al Bancu Mundial de la Muyer, entidá que con sede en más de 40 países en víes de desarrollu, ufierta créditos perbaxo de les condiciones de mercáu. Ente los demás candidatos al premiu taben la fiscal xefe del Tribunal Penal Internacional Carla del Ponte, y los ex presidentes d'UNICEF Carol Bellamy, el de la Reserva Federal de los EEUU Alan Greenspan, y el del Bancu Mundial James Wolfensohn, amás de l'actriz Angelina Jolie y el cantante d'U2.