La FSA-PSOE pierde seis puntos nes eleiciones que dexen la Xunta Xeneral más fragmentada

|

Javier Fernández resultó vencedor de les eleiciones n'Asturies pese a sufrir un baxón importante de votos. La FSA-PSOE, col 98,43 por cientu escrutáu, algama 14 diputaos, 3 menos que nel 2012, al sumar un 26,37 por cientu del total de votos (32,10 por cientu nes anteriores). El PP aumenta a 11 escaños y Podemos entra con 9 nun Parllamentu con seis partíos representaos.

La mayor sopresa de la xornada foi'l descensu de Foro, que pierde 80.000 votos y pasa de 12 a 3 diputaos (d'un 24,8 por cientu de los votos a un 8,20). Izquierda Xunida consigue caltener el resultáu anterior con 5 diputaos y Ciudadanos entra con 3. Los porcentaxes totales son los siguientes: FSA-PSOE (26,37 por cientu), PP (21,57 por cientu), Podemos (19,07 por cientu), IX (11,99 por cientu), Foro (8,20 por cientu) y Ciudadanos (7,13 por cientu).

Queda fuera de la Xunta Xeneral UPyD, que pasó del 3,74 por cientu de los votos al 0,80 por cientu, asitiándos como la sétima fuercia política del país. Equo queda nun 0,36 por cientu, mentes qu'Andecha Astur, que vivió una xornada movida pola retirada de les sos papeletes, nun 0,18 por cientu rozando los mil votos. La formacion nacionalista nun descarta impugnar les eleiciones, yá qu'en dellos colexos eleutorales nun hebo papeletes suyes hasta les 14 hores.

La participación, mentes, foi del 62,14 por cientu, mui superior a les anticipaes del 2012, cuando votó un 51,15 por cientu del total. Sicasí, resulta menor que nes del 2011, cuando se rexistró un 66,89 por cientu. Hebo un 1,89 por cientu de votos en blanco y un 1,41 por cientu, de nulos.

Circunscripciones

Nel occidente'l trunfu foi pa la FSA-PSOE con 3 escaños, siguíu del PP, con 2, y Podemos, con 1. La formación liderada nesta circunscripción por Andrés Ron llevó'l que ganara Foro nel 2012. Mentes, pal oriente, venció otra vegada'l PSOE (2), anque'l PP recupera y pasa de 1 a 2 escaños. Podemos entra con 1 y Foro pierde los dos que tenía.

Nesti enllaz pue consultar tolos datos d'estes eleiciones nacionales.

Conteníu especial: 
Contador Estadistiques