La FSA da-y un ultimatum a IX pol asuntu de Cangas del Narcea

El conflictu ente la Federación Socialista Asturiana (FSA-PSOE) y Izquerda Xunida al rau de la proclamación como alcalde de Cangas del Narcea de José Manuel Martínez (IX-BA-LV) colos votos del PP sigue allancáu y forzó ayeri la presentación d'un ultimatum de la FSA a IX. Los socialistes diéron-y a escoyer a IX ente obligar a dimitir al so alcalde o a espulsar a los sos trés conceyales en Cangas primero de siguir col diálogu pa llegar a la creación d'un executivu conxuntu pa gobernar Asturies y que tien reunión puesta pa esti xueves.

L'alcuerdu ente IX y FSA pa gobernar en coalición los conceyos asturianos esixía que la fuerza de les dos con menos conceyales votare al favor de la otra, una fórmula que-y daba 6 alcaldíes a IX y 53 al PSOE. L'alcuerdu cumplióse en tolos conceyos sacantes en Cangas del Narcea, onde la francedura de negociaciones ente les dos fuerces pa llegar a un alcuerdu de gobiernu nel conceyu forzó una situación cola que nun se contaba como foi la proclamación como alcalde del candidatu d'IX-BA-LV.

Ello ye que, anque la dirección d'IX-y pidió a Martínez que dexare'l cargu, l'asamblea local d'IX de Cangas afitóse na so postura y condicionó la dimisión del que ye nuevu alcalde de Cangas dende'l sábadu a un alcuerdu previu colos socialistes de Cangas, colos que la coalición d'izquierdes franciere negociaciones pa llegar a un alcuerdu de gobiernu nel conceyu.

El qu'oficialmente ye alcalde de Cangas del Narcea, José Manuel Martínez, enraxonó más el debate asegurando que namás va renunciar a l'alcaldía en cuantes que'l socialista José Manuel Cuervo, alcalde de cangas dende 1979 hasta esti sábadu, anuncie que devuelve'l so acta de conceyal. Martínez acusó a Cuervo de "nun ser persona d'izquierdes" y de tar dimpuestu a gobernar Cangas en minoría.