La FSA afala a los sos diputaos a entamar la reforma del Estatutu d'Autonomía

La Federación Socialista Asturiana (FSA-PSOE) va pidir al so grupu parlamentariu qu'emprincipie los contactos col restu de les fuerces polítiques parlamentaries pa poner a furrular la ponencia qu'entame la reforma del Estatutu d'Autonomía. Asína ta acabante de decidíse na reunión de la Executiva Rexonal, na que'l secretariu xeneral de la FSA, Javier Fernández, señaló que cola reforma estatutaria "más que cuestiones d'índole identitariu" lo que pretenden "ye incentivar tolo que sia averar la política a los ciudadanos".

Sigún informó en rueda de prensa'l secretariu xeneral de la FSA, Javier Fernández, "yá se saben cuales son los planteamientos básicos del PSOE sobre la reforma estatutaria".

Nesti sentíu manifestó que los socialistes quieren que faiga una reforma estatutaria dientro del marcu constitucional pero ensin renunciar "a una gota d'ambición". Fernández señaló que "queremos que la reforma parta del trabayu del Conseyu Consultivu", y recordó que "el Conseyu constituyóse col alcuerdu de tolos grupos parlamentarios". D'esti mou en opinión de los socialistes el dictame del Conseyu Consultivu deberá servir como orientación básica pal iniciu del procesu.