La fiscalía caltién la pitición de dos años y mediu pa Cándido y Morala

El Ministeriu Públicu caltuvo la pitición de condena de dos años y mediu de cárcele pa los sindicalistes Juan Manuel Martínez Morala y Cándido González Carnero, acusaos de quemar una furgoneta y de protagonizar desórdenes públicos nes movilizaciones del sector naval del 28 d'avientu del 2004.

La vista tuvo marcada poles contradicciones de los cuatro policíes llamaos a testificar pola fiscalía, siendo que dos d'ellos aseguraron l'únicu autor de los fechos foi Juan Manuel Martínez Morala, mientres qu'otros dos identificaron a los dos acusaos como autores. Ún de los testigos policiales xustificó la diferiencia ente les declaraciones por tar dos de los axentes na parte baxa de la ponte de la cai Carlos Marx, nel llugar onde se desarrollaron les movilizaciones, mientres que los otros dos taben na parte d'arriba y nun teníen la mesma visión. La xueza Rosario Hevia entrugó a los funcionarios policiales como pudieron identificar a los acusaos dende distancies d'ente 30 y 50 metros un día d'inviernu a les seis de la tarde, más pa con ello lloviendo, como recordó ún de los testigos.

La defensa rescampló les "contradicciones" de los testigos de la fiscalía y les circunstancies en que se fizo la identificación de los acusaos, díes dempués de los fechos y al traviés de semeyes y d'imáxenes de televisión que nun s'aportaron como pruebes. L'abogáu de la defensa, Juan Prieto, dixo que'l vehículu que se quemó llevaba abandonáu diba un añu nesi mesmu llugar y aseguró que'l so propietariu "recibió presiones de la Policía" pa que ficiere la denuncia y reclamare por daños.

Pa la fiscal los fechos quedaron probaos na vista y refugó que los imputados s'acoyeren a la llibertá sindical en cuantes que "perpasaron los sos derechos al facer usu de la violencia". Pa la fiscal probóse na vista "la intención de los dos imputaos d'alteriar la paz pública y atacar la propiedá privao" faciendo "prevalecer el so interés sobre'l de terceres persones". la fiscal retrucó les declaraciones del abogáu dfensor sobre'l valor del coche quemáu, que la defensa peritare en 400 euros y l'acusación en 3.190.

Los dos acusaos ficieron usu de la palabra y defendieron la so inocencia. Los dos reconocieron tar nes movilizaciones como representantes de los trabayadores, pero afirmaron que nun participaren na quema de la furgoneta. Cándido Carnero afirmó sentise "víctima d'una persecución policial y política" mientres que Morala llamó l'atención sobre'l derechu a la defensa del so trabayu que tien cada ciudadanu. Morala ironizó tamién sobre la so situación, afirmando que "hai veces que me siento Supermán porque parez que lo faigo yo too".

N'acabando la vista, los dos sindicalistes procesaos marcharon xunto colos manifestantes qu'aconceyaben a la puerta de los xulgaos pa contra la sede central de Caxastur en Xixón, onde se concentraron en protesta polos ceses y tresllaos na entidá bancaria y pola actuación policial que tuvo llugar la nueche del domingu y na que s'echó vilentamente a los sindicalistes de Caxastur que llevaben once díes trancaos nun local de la entidá n'Uviéu en demanda de diálogu cola empresa.