La falta d’oficialidá dexó al asturianu fuera del repartu de 7,5 millones pal desendolcu d'intelixencia artificial

|
Chatbot

El PERTE Nueva Economía de la Lengua cuenta con xestionar 1.100 millones d’euros p’aprovechar el “potencial del español y de les llingües cooficiales como factor de crecimientu económicu y competitividá internacional” en delles árees. Una ye la intelixencia artificial (IA), a la que yá se destinaron 7,5 millones –el gallegu lleva 2–, repartu del que quedó fuera l’asturianu pola falta d’oficialidá.

Los Proyeutos Estratéxicos pa la Recuperación y Tresformación Económica (PERTE) son “proyeutos de calter estratéxicu con gran capacidá d’arrastre pal crecimientu económicu, l’emplegu y la competitividá de la economía española, con un componente altu de collaboración público-privada y tresversales a les diferentes alministraciones”. El Conseyu de Ministros aprobó hasta’l momentu doce, ente los que ta’l de Nueva Economía de la Lengua, que xestiona’l Ministeriu d’Asuntos Económicos y Tresformación Digital con financiación de la Xunión Europea.

En total son unos 1.100 millones los que se van destinar hasta 2025 p’afondar en siete oxetivos. Ún de les exes ye la intelixencia artificial, na que s’invertirán más de 330 millones de euros, en concreto en poner en marcha proyeutos como la creación de una Rede d’Escelencia n’Intelixencia Artificial o los Programes de Llingües accesibles, col oxetivu de proporcionar ferramientes dixitales pa persones con discapacidá y diversidá funcional y actuaciones del Plan Nacional de Teunoloxía del Llinguaxe y la so industria.

Otra área complementaria ye la creación de una base de conocimientu (corpus) en castellanu y llingües cooficiales, que cuenta con un presupuestu de 97 millones de euros, de que 10 tán destinaos a los proyeutos rellacionaos con llingües cooficiales. Ente los proyeutos que se desendolcarán figuren la creación de nuevos corpus (orales, cantu, llinguaxe de signos...) en castellanu y en llingües cooficiales accesibles pal so usu por empreses y investigadores, ente otros.

Cuatro proyeutos autonómicos

El Gobiernu yá repartió 7,5 millones d’euros pa estes xeres de desendolcu d’intelixencia artificial, nes que nun entró l’asturianu por nun ser llingua oficial. En concreto “pa financiar la creación d’una base sólida de conocimientu –formada por corpus de datos, ente otres ferramientes y recursos– nes llingües cooficiales del Estáu para que la so inclusión nes aplicaciones teunolóxiques sía rentable y atractiva pa l’Alministración y les empreses del sector”.

D’esa cantidá 3 millones van pal Barcelona Supercomputing Center; 2 reciben tanto la Euskal Herriko Unibertsitatea al traviés del Hizkuntza Teknologiako Zentroa (HiTZ) o Centru Vascu de Teunoloxía de la Llingua como la Universidade de Santiago de Compostela; y 500.000 la Universitat d’Alacant al traviés del Centro de Inteligencia Digital (CENID). Estos desendolquen los proyeutos AINA (Catalunya), GAITU (Euskadi), NÓS (Galicia) y VIVES (Comunitar Valenciana).

Contador Estadistiques