La evolución de les cases de comida en Xixón, na conferencia d'Ástura

L'historiador José Luis Carmona va falar sobre l'actu social de comer fuera de casa nos sieglos XIX y XX nel Atenéu Obreru de Xixón.

'Xixón, mesa y mantel. Evolución de los gustos y vezos nel comer fuera de casa' ye'l títulu de la conferencia mensual d'Ástura sobre cultura asturiana que va tener llugar esta tarde a les 19 hores, con entrada llibre. Va ponela'l llicenciáu en Xeografía y Historia pola Universidá d’Uviéu, autor xunto con Luis Arias de 'Comer fuera de casa: tres siglos de restauración gijonesa (1700-2000)', llibru asoleyáu pol Conceyu de Xixón nel 2019.

"Comer fuera de casa supón, y supunxo siempre, un actu prestosu polo que tien de disfrute gastronómicu, al que se xuncen importantísimes implicaciones sociales, festives, económiques y culturales que conformen un fechu tan cotidianu, y a la vez tan enllenu de complexidá", apunten dende Ástura, que con esta charra de Carmona pretende dar a conocer "la evolución de les cases de comida, los restaurantes y dellos otros llocales de Xixón que fueron perfaciendo el peculiar sabor de la ciudá. Asina, la so pequeña historia ta íntimamente venceyada a la de los gustos y vezos gastronómicos propios de cada momentu históricu y al placer del so disfrute por xeneraciones de xixoneses de toles clases sociales".

Nesi sen añade que "ye obligada la referencia histórica a cases de comida con tantu posu na vida cotidiana del Xixón de la nuestra dómina como La Pondala, Mercedes, Casa Víctor o Las Delicias, exemplos cimeros d’una amplísima y fértil ufierta".