La entrevista pa escoyer los redactores de la TV asturiana va ser n'inglés

Dempués d'asoleyase ayeri la convocatoria pa venti puestos técnicos, ta acabante d'espublizase en BOPA'l restu de la convocatoria pública d'emplegu pa cubrir les places na plantiya de la TV autonómica. La convocatoria de güei cubre'l restu de les places hasta cubrir la uifierta de 84 puestos, incluyendo les 25 places acutaes pa redacción, que son les qu'impliquen una mayor competencia llingüística por parte de los aspirantes.

Esa competencia llingüística van tener que demostrala los opositores a puestu de redacción nunos exámenes escritos que van desarrollase en castellanu y nuna entrevista oral que va desarrollase esclusivamente n'inglés, al revés quelos puestos técnicos, que tienen la opción de pidir la parte oral en francés o n'inglés. Lo que nun camuda nes prebes pa técnicos y pa redactores ye la parte que se-y dedica al asturianu, que namás apaez nel temariu dientro d'un puntu xenéricu que se llama "Característiques sociollingüístiques d'Asturies" y que va enxertu nun bloque de temes entituláu "característiques socioculturales d'Asturies" una fórmula que nun garantiza que los redactores del futuru énte autonómicu vayan tener conocimientu nengún de llingua asturiana.
Entrar a la convocatoria en BOPA