La Coordinadora llamenta que’l PSOE atara’l ciclu combináu de La Perea tando en funciones

|

El BOE d’esti martes anunció l’autorización de la central de ciclu combináu de 410 MW promovida por Endesa en La Perea. La Coordinadora llamenta que’l PSOE atara esta instalación tando en funciones y ensin contar cola opinión vecinal.
 
"Una vegada más, el PSOE demuestra la so sensibilidá ambiental nula al autorizar una instalación ensin atender les alegaciones numberoses que presentamos nós y les asociaciones de vecinos de la zona", señalen dende la Coordinadora Ecoloxista d’Asturies, coleutivu que critica que se renuncie “a atender los problemas asociaos a estes instalaciones industriales” y que’l PSOE facilite “la contaminación d’Asturies". "Sorprende que nun s’autoricen térmiques n’otros llugares d’España con menos contaminación y equí, que tamos fuera de norma tolos díes pola contaminación por partícules y óxidos de nitróxenu, autorícenles", añaden los ecoloxistes.
 
Esta asociación insiste en que la central, nel casu de funcionar, supón un aumentu significativu de les emisiones nuna zona afectada yá pola ubicación de la térmica d’Hunosa en La Peres y otres instalaciones asemeyaes nun radiu de menos de 10 quilómetros. "Las térmiques de gas son un procesu contaminante con emisiones de monóxidu de carbonu (CO) y dióxidu de carbonu (CO2), que contribúi al cambiu climáticu, amás d’óxidos de nitróxenu (NOx) y dióxidu d’azufre (SO2)", alerten.
 
Amás, la Coordinadora denuncia qu’esti ciclu combináu ye innecesariu y que va provocar problemes de ruíos y contaminación a les agües del ríu Caudal, amás del impactu de la instación de llinies llétriques y del gasoductu.
 

AdxuntuTamañu
PDF icon BOE La Perea.pdf171.98 KB
Contador Estadistiques