La Coordinadora Ecoloxista llamenta lo barato que sal vertir agües contaminaes n’Asturies: 600 euros

La multa de 600 euros que la Confederación Hidrográfica del Cantábricu impuso a Agar de Asturias por vertir agües contaminaes indigna a la Coordinadora Ecoloxista d’Asturies. La organización anuncia que va recurrir esta decisión.
 
Les denuncies que la Coordinadora y otres entidaes ciudadanes punxera ante les aiciones d’esta empresa asitiada en Bricia, Posada de Llanes, nos años 2010 y 2011 por vertíos d’agua contaminao nuna riega qu’acaba nel ríu Calabres, que desemboca en Niembru, llevaron a la Confederación a aniciar un espediente sancionador que, al final, terminó nuna multa de 600 euros, cantidá que l’organización ecoloxista considera “ridícula”. “Este empresa, que trabaya una media de 200 díes al añu nun procesu que podemos resumir en recoyer algues, llavales, coceles, blanquiales con hipocloritu, escureceles y, al final, moleles, cada día vierte mas de 175 m3, una cantidá importante d’agua que, de forma continua, va contaminada a una zona sensible qu’acaba na ría de Niembru”, espliquen dende la Coordinadora, qu’añade qu’esta agua nun pasaba pola “estación depuradora que tien construyida y que ta nuna situación d’abandonu”.
 
Sorprende a los ecoloxistes que, pese a que los vertíos facíense de manera consciente, la comisaria d’Agües “califique los fechos namái como leves” y que la Confederación ponga a ala empresa una multa de sólo 600 euros. La respuesta de la Coordinadora ante esta situación ye la presentación d’un recursu de reposición pa que la Confederación eleve la sanción a la empresa y qu’ésta nun salga inmune de tar contaminando per dellos años la ría de Niembru, porque “ye evidente que la sanción ridícula que propón l’organismu competente ye mas barata que namái’l gastu de lluz de tener la depuradora furrulando unos meses”.