La Coordinadora Ecoloxista denuncia un arramáu d'agües residuales en Gozón

Les agües residuales de la urbanización de Peroño tán acabando nel mar. La Coordinadora Ecoloxista d'Asturies denunció énte'l Gobiernu esti fechu del que responsabiliza al Conceyu de Gozón.

Según esplica nuna nota de prensa, esti agua contaminao debería bombiase hasta la depuradora de Macua, pero la realidá ye que fina nel mar Cantábricu nuna zona mui cercana a la playa de Lluanco, "col impautu que supón n'época de baños". "Entendemos qu'estos fechos suponen un delitu nidiu cometíu pol Ayuntamientu como entidá responsable d'alcuerdo a la Llei Orgánica 10/1995, al producise por neglixencia un riesgu grave pal equilibriu de los sistemes naturales, acreditao cola contaminación que carez la zona", espliquen los ecoloxistes, que recuerden qu'esti problema nun ye únicu n'Asturies, sinón que se repite en tola costa.