La Coordinadora Ecoloxista denuncia que l’ampliación de la papelera de Navia va traer más ocalitos a Asturies

La empresa estatal de celuloses ENCE tien a información publica'l trámite pa entamar l'ampliación de la so fábrica de Navia, un recrecimientu que se ve mui criticamente dende'l movimientu ecoloxista asturianu, qu'albidra "un agravamientu de la yá esmolecedora situación de contaminación nel conceyu de Navia".

La Coordinadora Ecoloxista d'Asturies alvierte que l'ampiación prevista pa la fábrica supón duplicar la capacidá de la planta de Navia, a la que recuerda que yá se-y dio autorización va pocos años pa aumentar l'emisariu submarín que lleva pa la mar los residuos de la fábrica. La Coordinadora pide que s'inxerte a esta industria dientro del grupu de les que tán oficialmente reconocíes como contaminantes y que se renegocien les sos cuotes d'emisión.Otramanera , con reconocer que la fábrica de Navia emplega procesos productivos menos contaminantes que va diez años, la Coordinadora alvierte que la fábrica suelta al agua entovía un altu nivel de residuos, bien d'ellos bioacumulables nos organismos vivos. Xunto col aumentu del nivel d'emisiones d'estos residuos, la fábrica va aumentar les emisiones a l'atmósfera resultantes de la incineración de residuos del procesu del papel pa producir corriente, qu'alagamen, al dicir de la Coordinadora, concentraciones mui molestes na redolada de la fábrica y que son causantes de males respiratorios.

Ello ye que'l plan estratéxicu de la empresa 2007 - 2011 conseña tamién que cola xuba de producción de la planta de Navia van duplicase les necesidaes de celulosa dende les 400.000 a les 800.000 tonelaes añales, que se traducen en 700.000 metros cúbicos de madera más. La Coordinadora albidra que, como gran parte de la xuba de producción en Navia vien de la mengua d'actividá en Pontevedra "ye mui probable que la empresa cuente con llograr gran parte d'esa madera con plantaciones n'Asturies". La organización ecoloxista afirma p'afitar esta sospecha que'l plan d'ENCE conseña l'abandonu de 13.000 hectareees d'ocalitu en en Galicia y 2.000 en Portugal. La Coordinadora afirma igualmente que la empresa invirtió a lo llargo d'estos años nun plan pa desarrollar clases nueves d'ocalitu capaces de medrar nos montes d'Asturies onde nun prenden bien les variedaes qu'existen agora.